HDP tersê do gird vist pîzeyê Erdoğan’î. Stratejiyê weçînayiş yê HDP, lîsteyê ci û atmosfero ke rona raştê eleqeyê gird ame û yeno. Her ke şino tewr vêşî çormeyî paşt danê HDP. Roşnbîr, niştox û xeylê siyasetmedarê tirkiye zî endî anê ziwan ke HDP do weçînayinan de serkewtişê gird bigîro. Anketê ke serva-qandê reydayişî viraziyenê zî îşaretê serkewtişê HDP û binkewtişê AKP damisnenê. No tablo pêrokîn xeyalanê ‘sîstemê serokwezîrtî’ yê Erdoğan’î pûç vejeno.
HDP biyo hewnê xirabîn yê Erdoğan’î û yê AKP. Nayî ra Erdoğan’î 11’ê Nîsan’î de, koyê Tendurek yê Agirî de talîmatê provokasyonî da. Artêşa gonîwerd ke bi fermana Erdoğan’î şî ser kar fina-onca gonî rijna; kesekê sivîl ra piya gerîlayeke zî qetil kerd. Artêşa Tirk bi zanabiyen eskerê xo riştî merdiş. Plana newî yê Erdoğan’î dewre de ya. Goreyê plan xeylê cayan de ‘operasyonê’ bi meqsedê provakasyon dê viraziyê. Nê ‘operasyonan’ de çend eskerî dê ‘şehît’ bikewê û HDP do zey mesûlê nê merdişan bîro damisnayen. Plana newî yê Erdoğan o ke bê çare mendo na ya. La no plan û hesabê tarî, talokeyî û şaş koyê Tendurek ra ageyra. Eskerê ke bi zanabiyen rişiyay merdiş û bî dirbetin hetê şarî amey xelesnayen. Rixmê nayî Erdoğan û çapemeniya ci ya piyakar hereketê serbestî yê Kurd, gerîlayanê ci û HDP sucdar kenê. Eslê xo de çiyo ke Erdoğan hêrs biyo, nêmerdişê eskeran o. Çike no dîktatorî pawite ke çend eskerî bimirê, o zî ser goniya înan de siyaset bikero. Cok ra dîktator heyetê taqîpkerdin zî nêwazeno. E ke no heyet roniyo, do komplo, hîle û kayanê qilerîn yê Erdoğan’î deşîfre bikero.
Goreyê vatenan artêşa gonîwerd do bi fermanê dîktatorî verra xeylê cayanê gerîlayan erd û asmenan ra ‘operasyon’ virazo û raya qaos akero. Bi no qaosî dîktator di bivejyo meydanan û êrişê HDP bikero û reyanê çormeyanê tirkperestan bigîro. Hedefê Erdoğan’î de ne xelesnayişê welat, ne peynî ardişê kiltûrê şîdet, ne zî çiyê do bîn esto. Hedefê ey de tenya ramitişê îxtidarê xo esto. Zewbîn merdişê kesan, qaosê welat, herb teba qaxuyê ey de niyo. Cok ra hendayî hêrişê HDP keno. Çi ke HDP nika keyeyê pêrokîn şaran, vengê bindestan û kamiya ceniyan o. Hedefê HDP de demokratîkkerdişê Tirkiye esto. Pawitişê heqanê şarê Laz, yê Çerkes, yê Kurd, Ermenî, Boşnak û yê bînan esto. Cok ra nika pêrokîn rengî çormeyê HDP de are biyê. Kesê ke bi se serrano çinî amey hesibnayen, amey qirkerdin, kamî û ziwanê xo vinî kerdî bi HDP rih gênê, benê ganî û werzenê pay.
Tirkiye de endî wextê şaran o. Dewrê partiyanê serd û meclîsê bêreng qediyeno. Endî heqê qerargirotiş yê şaran o. Şarî ciwyanê senî wazenê, çitûr wazenê biciwyê, welatê do çitûr wazenê dê xo qerar bidê. Endî peyniyê partiyanê bêrengî ke şaran kenê lete ayseno. Nê partî dê ya xo bivûrnê û siyaseta demokdratîk esas bigîrê, ya zî dê biqediyê. Zewbîn ray û tercîxê bîn çinyo. Xo ra bi girdbiyîna HDP nê partî zî roj bi roj gonî kenê vinî. Serva-qandê AKP hewce niyo kes teba bikero û vajo. Bi siyaset, vatiş û hemleyê şaş Erdoğan peyniya xo û yê AKP kuleno.