Labelê HDPe no weçînayîşî bin bandorê hêriş û tedayan de vîyarna. Şaristanê Kurdistan de polîs, lejkerê AKPe û çeteyê DAIŞe astengî vetî ke şarê kurd rayanê xo nêşuxilnî, la dijî nêy polîtîkayan de şarê kurd Kurdistan de rayê xo bi coş û heycan şuxilna.


Polîtîkayê Evrenî

Demo Darbeya 12’ê Êlule de zî şarî sero polîtîkayê teda, zilm û tersî ameybî şuxilnayîş, no ray weçînayîşê 1’ê Teşrîne AKP û Erdogan bi hembarî eynî polîtîkayê Darbeya 12’ê Êlule şuxilnayî. Hîna seyî ra 20’î sindoqan nêameybî hûmartiş, Ajansê Anadolu û Cîhanî dest pê spekulasyonî kerdî, peynî YSK zî rîpela xo betal kerd. Weçînayîşê de heme bêedelet û bêûsilî ser wekîla HDPe ya Amedî Nursel Aydogan qise kerd.


Do rixnedayîşê xo bidî

Wekîla HDPe ya Amedî Nursel Aydogan aşkera kerd ke ê zanaynê AKPe rayanê no weçînayîş de bipawa, labelê qet ona berzgirewtişê rayî yê AKPe nêpawitî û wina vat: “AKP mîyanê şaran de cîyakerî viraşt, AKP şaranê Tirkîyaye krîza ekonomîye, teda û zilmî reyde tersna û çi heyf ke verba nê polîtîkayan zî şarê Tirkîyaye tersayî. Dijî nêy polîtîkayanê AKPe vîyartişê bendê weçînayîşî zî serkewtişek o, labelê ma do verba şarê xo rixnedayîşê xo bidî. Ma do ronişî û kêmanîyanê xo ser bifikirî û nîqaş bikerî. Ma do şaranê Tirkîyaye ra polîtîkayê nêdeşîfrekerdiş ser rixnedayîşê xo bidî.”


HDP partîya dozî ya

Wekîla HDPe ya Amedî Aydogan destnîşan kerd ke Amed de yew wekîl kêmvetiş seba HDPe do problem nêbo, çimkî HDP partîyeke dozî ya û no ser zî ê dijî heme nê polîtîkayê lêmin de têkoşînê xo de do bidomnî û wina dewam kerd: “Ma eke têkoşînê xo hîna hera bikerî, ma do rêjeya seyî ra 2 hewna tepa bigêrî. Demo Darbeya 12’ê Êlule de Kenan Evren sindoqan seyî ra 92 ray girewtbî, çimkî Evren şaranê Tirkîyaye ser polîtîkayê tersî înşa kerdbî. Eynî polîtîkayan AKP weçînayê 1’ê Teşrîne de şaranê Tirkîyaye ser şuxilna. Çi heyf ke şarê Tirkîyaye, şarê bêrayvist î, no ser zî terorê dewlete ra tersayî. Tena AKP nê, kam partî polîtîkayê tersî bişuxilno se şarê Tirkîyaye do bitersî. AKP zî nê tersê şaranê Tirkîyaye weş analîz kerd. No ser zî ma seba şaranê Tirkîyaye rayvistkerdiş rê dest pê xebatan bikerî.”


Ma do serkewtişê xo berz bikerî

Aydogan ciresna ke nika 21 wekîlê cenî ya HDPe estî, no ser zî ê bawer î ke do 21 cenî reyde xebatê hera bikerî, çi heyf ke verê weçînayîşê 1’ê Teşrîne wekîlê cenîye performansê xo hîna weş nêeşkîyayî nîşan bidî û wina domna: “Ma êdî embazê xo yê cenîyan reyde bêrê têhet û averşîyîşê çareserî û aştîye ser xebatê xo hera bikerî. Çimkî heme cenîyî ma ra ona yew nêzdîbîyîş pawiyenî. Her tim têkoşînê cenîyan dinya de serkewt bîyo.”


BÊRÎTAN ELYAKUT/JINHA/AMED