Çend rojî verê Serekkomar Erdoganî seba ke Donald Trumpî reyde pêvînayîş bikero, şîbî Amerîka û verê meqamê Sersefîrê Washîngtonî Serdar Kiliçî de raştê protestoyan amebî. Pawitoxê sersefîrê tirkî yê Amerîka û Erdoganî hêrişê grûba ke protesto kerdêne kerdbî û çalakgeran derb kerdbî. No hêriş hetê medyaya dinya û îdarekarê Amerîka ra bi hawayo wişk ame rexnekerdiş. Reyna pawitoxê Erdoganî Zîrveya Pawitişê Nukleerî yê 2016 de Enstîtuyê Brookîngsî ver de hêrişê çalakgeran kerdbî û rojnamegeran eştbî teber. Babete ser o Seyîd Riza Dêrsimo (61) ke hemwelatîyê Amerîka yo û amebî kutiş, qisey kerd.
‘Erdogan dîktator û faşîst o’
Dêrsimî qiseykerdişê xo de va ‘Erdogan dîktator û faşîst o’ û wina dewam kerd: “Erdogan her tewir zilm û hêrişan keno. Bajarê Kurdistanî serûbin kerd. Cenazeya dayîka Taybete û domana ke dolaba cemedî de ameybî vindarnayîş, nînî vîrîkerdiş. Eke ez sebebê xo yê protestokerdişê Erdoganî rê vaja do rojan nêqedyî. Zîyaretê Erdoganî yeno manaya hêriş û dişmenîya kurdan. Cok ra mi protesto kerd. Erdogan wazeno ke Amerîka zî bikero ortaxê xo yê hêrişan. Ma bi nîyetê aştî çalakîya protestokerdişî viraşt. La kutikê Erdoganî bi hawayo hovane ma kutî û dayî sereyê mi ro. Erdogan talîmatê kutişî da. Heta ke talîmat nêbo ê nêeşkenî hêriş bikerî. Heme vîdeoyan de her çî qeydkerde yo. Lengê xirabî ma rê çînayî û ma provoke kerdî, dima ra zî ma kutî.”
Ma do doze biakerî
Dêrsimî dewamê qiseykerdişê xo de bale ant heqê protestokerdişî ser û wina va: “Heqê her kesî esto ke protesto bikero. Sersefîrê Tirkîya çend serrî yo ke tîya de yo. Seba protestokerdişan, destûr nîno girewtiş. Eke hûmara çalakgeran 100 kesî ra zêdeyêr bibo, merdim destûr gêno. Tirkîya nêeşkena ke bivaja ‘bê destûr protesto kerd’. Sersefîrê Erdoganî bîla sebeb ameyî mi ser û sereyê mi şikitî. Polîsî mi destê înan ra girewt. La ê reyna zî hêriş kerdî. Mîyanê înan de kesêk mi rê engişta xo leqna û va ‘şima şêrî kura, ma do şima kurdan rê dinya teng bikerî’. Ma amadekarîya doze kenî. Kesê ke ameyî kutiş do doze biakerî.”
SELAMÎŞ ASLAN / DÎHABER / ANQARA