MÛRAT KÛSEYRÎ / ANF / STOCKHOLM
Wezîra Karanê Teberî yê Swêdî Margot Wallstrome xebatkaranê çapemenîya xerîbe yê ke Swêd de yê reyde ronişte û derheqê polîtîkayanê teberî yê Swêdî de û rojeve de cewab da persanê rojnamegêran.
Wallstrome da zanayene ke înan xeylî reyan waşto, ganî zextê sere muxalîf, rojnameger û organîzasyonanê cimatkîyan ê sivîlan biqedîyê û va ‘ma paştî danê muxalifanê tepişteyan, temsîlkarê xo şirawitê roniştişanê dewayanê înan’.
Wallstrome seba mehkemekerdişê endamanê DAÎŞî, derheqê awanbîyayîşê mehkemeya mîyanneteweyî de va ‘Swêdî seba awankerdişê mehkemeyêka mîyanneteweyîye însîyatîf girewto, kewto mîyanê cehdan’ û wina domnaye: “Rixmo ke xeylî welatê ewropayijî bi hawayêkê pozîtîfî nizd benê zî rîyê astengîyanê huqûqî û sîyasîyan ra awankerdişê mehkema beno ke goreyê wextêk dem bigêro.”
Wallstrome dîyar kerde seba ke Îraq de cezaya kiştişî esta, ê vera nê de yê ke Îraq de mehkemeyêka mîyanneteweyîye bêro awankerdene û wina dewam kerde: “Seba ca û hetkarîya fînansî ya seba mehkemeya mîyanneteweyîye pêvînayîşê ma ê welatanê binan reyde dewam kenê.”