Têkildarî êrîşên li dijî Kurdên li herêma bakurî Helebê de endamê Meclisa Leşkerî ya Eniya El Ekrad Elai Cibo axivî û diyar kir ku roj li pey rojê rastiya êrîşên li dijî gelê Kurd derdikeve holê. Cibo, diyar kir ku herî dawî rastiya êrîşên li dijî gundên Kurdan ên li herêma Izaz û Babê yên Helebê ku di vê herêmê de Kurd, ereb û tirkmen bi biratî li ser heman erdingariyê bi hev re dijîn, aşkera bû. Cibo, diyar kir ku hikûmeta tirk li pişt êrîşane û ev tişt anî ziman: “Hat hînbûn ku Tirkiye li pişt êrîş û planên li dijî Kurdan pêk tên disekine, di vê yekê de tu guman nemaye. Tirkiyeyê bang li fermandarên Artêşa Azad ên di eniyên şerê li Humis, Hema de têk çûbûn kir û di 26’ê tîrmehê de li Dîlokê bi beşdariya 70 fermandarên Artêşa Azad civîn li dar xist.”
Cibo, di berdewama axaftina xwe de da zanîn ku piştî di civîna Dîlokê de peyman hat îmzekirin, fermandarên tabûran vegeriyan Sûriyeyê û plana ku li dijî gelê Kurd hatibû dayîn destpêkirin û wiha axivî: “Êrîşa li dijî Kurdan piştî vegera fermandaran a ji Dîlokê dest pê kir. Ji fermandarên ku cihê xwe di êrîşan de girtin û di civîna Dîlokê de amadebûn Şêx Emced Bîtar, Eqîd Fatih Hesûn û Ebû Zahî hebûn. Van li bajarê Reqayê odeya çalakiyan a bi navê ‘Odeya Çalakiyan a Mucahîdina li Gundên Bakur’ saz kirin. Di vê odeyê de gelek tabûr hene, navê Tabûra Heyet Eluma, Ketîbet Ebû Bekir, Cemaeta Fadî Xideyir hatin naskirin. Daxuyaniya endamê meclisa leşkerî ya Artêşa Azad a Helebê Ebdulcebar El Iqêlî ku dibêje em ê Kurdan tune bikin rastiya planan nîşan dide. Daxuyaniya El Iqêlî piştî civîna Dîlokê hatine dayîn.”
Cibo, da zanîn ku piştî civîna Dîlokê bi 2 rojan komên çete êrîşî bajarokên Til Eran, Til Hasil û gundên Kefer Sixîr, Cih Elasî, Dodiyan, Til Şeîr, Qolsoc, Til Medîq, Til Betel, Nîrbiye, Tiwês, Biric, Til Cerce, Qebasîn û Sed Şehbe ku navendên hêzên El Ekradê têde bûn kirin.
 
Peymana qirêj 


Cibo, destnîşan kir ku di peymana Tirkiye û Artêşa Azad de hatiye plankirin ku di 117 gundên Kurdan ên herêmê de hebûna hêzên Kurd were tunekirin û ger pêwîst bike dê Kurdên herêmê tune bikin. Komên behsa mijarê ku li herêmên din ên rojavayê Kurdistanê têk çûn, dixwazin li wê herêmê di navbera Kurd û ereban de nakokiyê derxin.

Cibo, diyar kir ku heman tabûrên li bajarê Dîlokê civiya ne êrîşî herêma Minbic û Babê dikin.
Tabûrên behsa wan tên kirin ev in:
* Dewleta Îslamê Iraq û Şam/El Nusra
* Lîwai El Tewhîd
* Lîwai Ehrar El Şam
* Lîwai Tehrîr Sûriya
* Lîwai El rebî El Erebî
* Tevgera Fecir El Şam
* Lîwai Fetih El Ûla
* Lîwai Asifet El Şimal
* Lîwai Sultan Muhamed
* Mele Îbrahîm

* Artêşa Muhemed


Çeteyên Kurd jî ev in


Cibo, diyar kir ku hin komên çete yên Kurd jî beşdarî van êrîşan bûne û ev nav rêz kirin:
* Eniya Îslamî ya Kurd
* Komela Kurdî (bi fermandariya Mistefa Bêwar ê ji Efrînê)
* Lîwai Yûsif El Ezma (bi fermandariya Besam Hacî Mistefa )
* Ehfad Selah El Dîn
* Lîwai El Edil
* Tabûra Nuredîn Zenkî (bi fermandariya Tewfîq Şehab)
Cibo, di dawiya axaftina xwe de aşkera kir ku ev komên Kurd ên xwefiroş û êrîşî gundên Kurdan dikin û welatiyên Kurd dikujin û koçber dikin.

Cibo, di axaftina xwe de xaleke girîng jî destnişan kir û ev tişt anî ziman: “Koma bi navê Mele Îbrahîm li Tirkiyeyê hatiye avakirin, di vê tabûrê de serbaz û pisporên tirk cihê xwe digirin, vê komê di êrîşa bajarokê Til Hasil, Til Eran û gundê bejahiya rojhilatê Helebê de cihê xwe girtin û komkujî pêk anîn.”


ANHA/EFRÎN