KCDK-E ke vist vîrî ke netîceyê êrişî de bi desan Kurdistanijan weşîya xo kerdo vinî vengê nûmayişê lezîn da. KCDK-E qetlîam zey leteyê êrişanê qirkerdin yê dewletanê tirk, ereb û fars hesibna û veng da şaranê Awrûpa ke bikewê hereket. Damûstayîn de vajîya ke cînayetê ke bi serrano dûştê şarê kurd de virazîyenê tû qetlîama tewr peynî yê Qamişlo do şarê kurd tekoşînê demokrasî û azadî ra peyser nêgîro.
DAIŞ û welatê ke paşt danê ci mesûl ê
Derheqê Qetlîama Qamişlo de jû nêrazîbîyen zî Partîya Demokratîk yê Şaran ra amê. HDP qetlîam ra DAIŞ û welatê ke paşt danê ci mesûl girot. Damûstayîna ke hetê Desteyê Rayverîna Nevendî yê HDP ra ame weşînayen de çeteyê barbar yê DAIŞ amey lanetkerden, kesê ke weşîya xo kerdî vinî rê rehmet, malbatanê ci ra serweşî wazîya.
HDP vist vîrî ke DAIŞ o ke mehkûmê vindîkerdiş o bi nê êrişan nêşkeno peynîya ke ci pawena bivûrno. Damûstayîn de vajîya ke dûştê Qetlîama Qamişlo şarê dinya dê verra DAIŞ tewrê xo berz bikerê û qerardarîya tekoşîn yê Quwetê Sûrîyeya Demokratîk berz bibo.
Partîya Demokratîk yê Şaran na qetlîam ra DAIŞ ra pîya welat û îxtidarê ke paşt danê ci mesûl girot. Damûstayîn de hayr ancîya êrişanê verîya nika yê dûştê Qamişlo ser û vajîya ke Qamişlo do badê na êriş zî dirbetinanê xo derman bikero û belayê DAIŞ ra bixelesyo. La welat, sazgeh û îxtidarê ke paşt danê nê çeteyan dê vernîya tarîxî de hesabdayen ra nêxelesîyê .
‘Êrişkarî nêşkenê serkewê’
Kongreya Civaka Demokratîk zî bi jû damûstayîn Qetlîama Qamişlo lanet kerd. KCD vist vîrî ke êrişê înkar û îmha ke bi destegê quwetanê mavên netewî herem de dûştê şarê ma virazîyenê netîceyê xoverdayişê Quwetanê Sûrîyeya Demokratîk û şarê kurd veng (tol) amey veten. KCD hayr ant hemleya xelesnayişê çeteyan hardê Sûrîye ra û operasyonê xelesnayişê Minbicî ser û aşkere kerd ke na hemleya xelesnayiş quwetanê mavên netewî û pîyakaranê ci vist panîkî. KCD da zonayen ke nê quwetê heremî û mavên netewî ke kewtê tersî çeteyanê DAIŞ fina riştî kurdan ser û Qetlîama Qamişlo day viraşten.
KCD rîwalê qetlîam DAIŞ û pîyakaranê ci lanet kerd û da zonayen ke nê êrişî dê nêresê emelanê xo û nêşkenê serkewê. KCD veng da şarê kurd, dostanê ci û hometa mavên netewî ke verra Qetlîama Qamişlo de bêveng nêmanê. KCD peynî de kesê ke weşîya xo kerdî vinî rê rehmet waşt û malbatanê ci ra pîya şarê kurd rê serweşî waşt.
Partîya Demokratîk yê Hereman, KNK û xêlê çormeyanê bînî zî rîwalê qetlîam çeteyan ra pîya paştdayoxanê ci lanet kerdî û malbatanê kesê ke weşîya xo kerdî vinî rê serweşî waşt.
NAVENDÊ XEBERAN
Qamişlo de roja tarî
Sûka Qamişlo ê Rojawayê Kurdistanî de, vizêr şodir êrişê bi wesayîta bombebarkerdî viraziya. Netîceyê teqînayişî de 35 kesî şehîd kewtî û vêşiyê 140 kesî zî bî dirbetin.
Sûkanê Rojawa Kurdistanî ra Qamişlo, vizêr bi hedefê êrişekê qilêrîn. Êriş taxa Xerbî de, viraziya. Jû wesayîta bombebarkerdî, nezdîyê camîya Qasimo û Asayişê Xerbî de teqîya. Teqînayişî heta taxanê dûrî de zî tesîrê gird kerd. Netîveyê teqînayişî, tewr kemî 35 kesê sivîl şehîd kewtî û 143 kesî zî bî dirbetin. Qurbanan miyan de, xeylê domanî zî estê. Rewşê xeylê dirbetinan giran o û beno ke, amorê qurbanan vêşî bibo. Cenazeyî û kesê dirbetinî hewadiyayî nêweşxaneyanê Qamişlo. Wextê teqînayişî de, xeylê banê çormeyî zî rijîyayî. Goreyê zonayişan, cenazeyê xeylê kesan zî binê xirbeyan de mendê. Kordînasyona Pêroyî yê hîrê Kantonanê Rojawa rîwalê Qetlîama Qamişlo 3 roj şîn îlan kerd.
‘Hesabê ci pers kenime’
Fermandarînê Pêroyin ê Asayişê Rojawa derheqê teqayinê Qamişlo de damûsnayin da û aşkere kerd ke bi êrişî sivîlî hedef girotiyayê.
Fermandarînê Pêroyin ê Asayişê Rojava detayê êrişê Qamişlo bare kerd. Fermandarînê Quwetanê Asayişî ard ziwan ki êriş bi jû kamyona bombe barkerdî viraziyaya û cayê sivîlî hedef girotiyayê. Fermandarîn keyanê qurbanan rê serweşîn û dirbetinan rê şîfa wast û ena mesaj dê: Mayê hewl danê kesê êriş organîze kerdo û alîkarî kerdo vejê werte. Ma zey Quwetê Asayişê Rojava, sozê girotinê heyfê şehîdan danê.
ANHA/QAMIŞLO