ERDOGAN ALTAN / MA/QAMIŞLO
Federasyonê Demokratîke yê Sûrîyeya Vakurî 22ê Êlule de herêmanê Cizîr, Firat û Efrîn û kantonanê Qamişlo, Hesekê, Girê Spî, Kobanê, Efrîn û Şehba de weçînayîş viraşt û hemserekanê komunan weçîna. Weçînayîşê komunan ra dima do weçînayîşê bajar, kanton, herême û tewr peynî zî do weçînayîşê federasyonî bêro viraştiş.
Babete ser o Endamê Heyetê Îdareyî yê TEV-DEMî Aldar Xelîlî qisey kerd. Endamê Heyetê Îdareyî yê TEV-DEMî Xelîlî va ‘projeyê federalî 3 sebeban ver serkewt’ û wina dewam kerd: “Nînan ra sifteyîne neteweya demokratîke û Sûrîyeya demokratîke bî. Êdî şar sîstemê merkezî qebul nêkerdêne û ma zî herinda ci de sîstemêko federal esas girewt. Ma sîstemê xo game bi game eşt dewre; ma ewil bi perwerdekerdişê xo dest pêkerd. Sîstem do senîn bibo, ma do senîn yewbînan reyde bicuyî, problemê kurdî do senîn çareser bibo û sewbîna persan rê ma cewab gêrayî. Ma nê probleman ser o vindetî û ma game bi game çareser kerd. Ma sere de nêva federasyon, tena ma waşt ke wa veng û rengê ma bêro dîyayîş.”
Ma zaf zehmetîyî antî
Xelîlî dewamê qiseykerdişê xo de va ‘sifteyîn ma meclîsê xo awan kerd û îradeya xo nîşan da’ û wina domna: “Ewil şarê ma bawer nêkerdêne û vatêne ‘demê awankerdişê meclîsî nîyo’. Wexto ke ma weçînayîşê meclîsî viraşt, estena rejîmî merdiman tersnayêne û înan ma ra vatêne ‘şima mîyanê xeyalî de cuyenî’. Wextê weçînayîşan de ma zaf zehmetîyî antî. Ma mektebê xo akerdî. Ma dima ra dest bi rêxistinekerdişê komelî kerd. Seba pêardişê asayîşî ciwanê ke destê înan de çiweyî estbî, ameyî amadekerdiş. Dima ra ciwanan sîlehî girewtî destê xo. Ma seba weşîye Heyva Sorî awan kerd, dima ra YPG û YPJ awan bîye û şaredarîye xebetîyayî.”
Xoserîya demokratîke ameye îlankerdiş
Xelîlî va ‘Ma seba ke şarê xo veng de nêverdî, xoserîya demokratîke îlan kerd’ û wina dewam kerd: “Ma hetê meclîsê şarî, taxe û dewan de meclîsê hukmatî zî awan kerd. Labelê no goreyê sîstemê ma nêbî. Ma meclîsê îdare û qanûnviraştişî awan kerd. Eke ma nê meclîsan cîya cîya esas bigirewtêne, ma do bibîyêne dewlete. Ma zaf zehmetîyî antî; çimkî dinya de nimûneya sîstemê ma çinêbî. Cok ra ma zî tam nêzanayêne.
Temelê sîstemî de komunî estbî
Xelîlî dîyar kerd ke înan sey TEV-DEMî sîstemo ke 2 meclîsan ra pê ameyêne heta cayêkî ard, labelê qîm nêkerdêne û wina va: “Ma hewl dayêne Îdareyê Xoserîya Demokratîke biresnî heta federasyonî û seba nêyî ma şaranê bînan reyde îttîfaqî viraştî. Seba nêyî ma verê komunî awan kerdî. Verê herkesî vatêne qey komunî aydê PYD yî û cok ra zaf kesî beşdar nêbîyêne. Nika herkes nê sîstemî qebul kerd û xora bingeyê nê sîstemî zî komun î. Keso ke biwazo nê komunan de ca bigîro, ganî tesdîqê şarî bigîro. Yê adil no yo û eke komunî bi hawayo saxlem nêrî awankerdiş, sîstem nêronîyeno.”