Roja weçînayîşî seba ke derheqê aye de cezaya tesdîqbîyaye esta, bi nameyê Fatma Dînlere de yew cinîya 72 serreyî ameybî tepiştiş, dima ra tewqîf bîybî. Dima ra cezaya Dînlere açarîyaybî cezayê pereyî û badê ke pere ame dayene, Dînlere serbest ameye veradayîş.
Babete ser o Dînlere qisey kerde û qala wextê tepiştişî de nizdîbîyayîşê polîsan kerde. Dînlere dîyar kerde ke seba aye vatî, ‘eke pere bîyarî serbest veradê, neke bierzê zîndan’ û qiseykerdişê xo wina daye domnayîş: “Aye roje bê awe û nanî mi berdî Amed. Senî ke ez resaya Amed, polîsan mi wesayît ra peya kerdî û yewbînan ra vatî ‘biewnê, ma şima rê terorîst ard’. Ez aye roje tepişte menda.”
Dînlere peynîya qiseykerdişê xo de mesajêko winasî da: “Ê dayîkê sey ma ra tersenî. Ma terorîst nîyî. Eke mi bizanayêne cezaya mi esta, reyna zî mi do raya xo bikar biardêne. Terorîst ez nîya, yê ke bi nê emrî de nînan bi mi dayî cuyayîş terorîst î.”
ANF/MÊRDÎN