Unîversîteya Lozanî de profesorê tarîxî û Parlamenterê Kantonê Cenevre Jean Batouyî derheqê Sîstemê Serekî û polîtîkayê Erdoganî de qisey kerd û vînayîşê xo ard ziwan. Batouyî va ‘teşebusê derbe ra dima Erdoganî seba ke mîyanê welatê xo de otorîteya xo qewetin bikero, teşebusê derbe ra feyde dîyo’ û qiseykerdişê xo wina domna: “Erdoganî bi mehneya derbe vera muxalefetî de şer îlan kerd. Serkewtişo ke HDPyî 7ê hezîrane de qezenç kerdbî ver Erdogan zaf tersayo. Cok ra Erdoganî netîceyê weçînayîşî çinî hesibna. Weçînayîşêko newe viraşt û hêzê xo peyser girewt. Dima ra dest bi hêrişê kurd û heme muxalîfan kerd.”
Ewropa bêveng a
Batouyî dewamê qiseykerdişê xo de va ‘seba ke peymanê sîyasî û ekonomîkî estî, Ewropa nêeşkena Tirkîya ser de zextan bikero’ û va: “Ganî dormeyê çep û çepgiran vera vindetişê hêzê dinya û Ewropa de piştîdayîşêyewbînanê xo awan bikerî. Sey Rojawanî ganî Tirkîya de zî piştî bidîyo têkoşînê şarê kurdî.”
Ver de benî asteng
Batouyî qiseykerdişê xo de va ‘eke rewşêka winasî de referandûm bêro viraştiş, o wext netîceyê referandûmî do demokratîk nêbo’ û wina domna: “Tirkîya nika ver bi dîktatorî şona. Raybazê ke Erdogan xebetneno, raybazê dîktatorî yî. Xoverdayîşê şarê kurd û hetê demokratîkî nîşan danî, vernîya Erdoganî de astengî virazenî. Seba ke nêeşkenî kurdan çin bikerî, cok ra dîktatorîya înan zî demdemî ya û sernêkewena.”
Paştîdayîşê kurdan
Batouyî peynîya qiseykerdişê xo de va ‘eke piştî bidîyo şarê kurd û hetanê demokratîkan, eşkîyeno vernîya Erdoganî bêro girewtiş’ û qiseykerdişê xo wina qedêna: “Ez dibare vana; eke hêzê sosyalîst û çepgirî yê Ewropa û dinya piştî bidî şarê kurd û dormeyê demokratîkan, o wext vernîya rejîmê Erdoganî bi hawayo rehetî eşkîyeno bêro girewtiş. Ganî piştîdayîşo ke seba şarê Filistînî amebî kerdiş, seba şarê kurd û hetanê demokratîkan zî bêro kerdiş.”
SERKAN DEMÎREL / ANF / CENEW