Verfekê HDPyî Osman Baydemîr Merkezê Pêroyî yê HDPyî de bi îzehetêk derheqê îxlalê ke referandûm de ameyî kerdiş de raporê partîya xo aşkere kerd.
Baydemîrî qiseykerdişê xo de va ‘îxlalî tena roja referandûmî de nê, roja ke paketê bedilnayîşî ame komîsyonê Meclîsî ra nata dest pêkerdî’ û wina domna: “Hema wextê meclîsî de qaydeyê reya nimite ame îxlalkerdiş. Hemserekê HDPyî, 13 parlamenterî, 3 endamê MYK û 750 îdarekarê bajar û qezayan tewqîfkerde bîy û ma prosesê referandûmî wina derbaz kerd.”
Heme îmkanê dewlete xîzmetê ‘ya’ de bî
Baydemîrî dewamê qiseykerdişê xo de va ‘heme îmkanê dewlete seba kampanyaya ‘ya’ ameyî xebetnayîş’ û wina dewam kerd: “Bêedaletîyê ke hetê weşanî de ameyî kerdiş, girêdayeyê polîtîkayanê hukmatî de bîy. Hukmat kampanyaya xo de hêrişê HDPyî kerd û HDPyî sucdar kerd, labelê seba cewabdayîşî heqê qiseykerdişî nêdîya HDPyî. Parlamenterê ma wextê kampanyaya xo de ameyênê tepiştiş û cayê mîtînganê ma ame bedilnayîş. Bajarê sey Riha, Colemêrg û sewbîna xeylê cayan de OHAL sey mehne ame nîşandayîş û mîtîng û aktîvîteyê ma ameyî qedexekerdiş.”
Kurdî sere nêronayî
Baydemîrî qiseykerdişê xo qala betalbîyayîşê serekîya sindoqan kerd û wina va: “Zaf bajaran de serekîya sindoqan ya 140 kesan bi mehneya ‘bi hawayo nêbaş yenî zanayîş’ ame betalkerdiş. No referandûm tarîxê Komare de weçînayîşo tewr şikin bî. Cok ra no hukmat do bi Evrenî ra xirabêr derbazê tarîxî bibo. Muşahîdê ma roja referandûmî de ameyî astengkerdiş. Destûr nêdîya ke cinîyî reyanê xo bixebetnîy. Hema vaje 3 mîlyon reyî ameyî astengkerdiş. Reyna zaf cayan de seya sîlehan de reyî ameyî xebetnayîş. Pêro pîya 420 sindoqan de qet reya nê nêvejîyaya. 791 sindoqan de endamê HDPyî çinêbî. Bi mîlyonan reyê bêmor ameyî xebetnayîş. Netîce de hûmaritişê reyan goreyê qanûnî nêame kerdiş. Her çiqas ke hende neheqîyî ameyî kerdiş zî şarê kurd sere nêrona. Lazimîya ma qanûno bingeyîyêko newe yo.”
DÎHABER/ANQARA