Ewro zerya Kurdistan onca serva hîrê gulê serhewadêr erzena. Koyanê welatî serva înan vinderdişê hurmetî girotiyo. Awê roy û çeman ewro bêveng herikyenê. Roj pêrokîn hewrê siya vila keno û serva înan akewno. Pêrokîn teyr û tûrî, dar û birrî, va û vasî, vewr û berfînî nê ceniyan rê silamî vindertê. Ê ceniyê ke alwozê ma, xizirê ma, mabedê ma, rayverê ma yê. 

Rojverê serragêra qetlîama 9ê Çile de, kiştoxan jû qetlîamê da bîn viraştî û fina-onca hîrê ceniyê Kurd yê bînî qir kerdî. Celladan onca ceniyan hedef girot û Sêvê Demîr, Pakîze Nayir û Fatma Ûyar, 4ê Çile de, qezaya Şirnex Sîlopî de kiştî. Zerriyê înan, ke serva azadî eştî ra maç kena, kiştoxan bi nefret lanet kena. 

Ê dişmenê ceniyan, homayê wextanê taritî yê. Rih û wijdanê înan biyo qilerîn-leymin. Cok ra, sûc ser sûcî kenê, bi rijnayişê gonî wazenê xo  qûwetîn bikerê. La ceniyê Kurd nê celladan ra nêtersenê, înan rê meydan wanenê. Ê çiqe kişenê, cenî hendayî benê jêde û qûwetîn. Ê no qûwetê ceniyan ra tersenê, cok ra hêrişê ceniyan kenê, înan kişenê. 

Hedefgirotişê Sakîne Cansiz û alwozanê ci zî no ters ra bi. Çike ceniya zerrî gird Sara, verniya înan de, tim û tim sereberz bî. Bi xoverdayişê girotxane, ver vetişê sînoranê civakî yê klasîk, bi herb kerdişê verniya serdestî, zihnîyetê rejîmî û civakî qelêşna. Cok ra bî hedef, cok ra serdestî tersenê ke kiştoxan ceza bikerê.

Fransa de heta nika 25 cînayetê polîtîk biyê. Cînayetê Ben Barka ya Fas’î ya 1965î û cînayetê Dulcîe September a Afrîqayî ya 1988î  nînan ra tenya didiyê ci yê. La mixabin jewê nînan zî ronşî nêkerd, ceza nêda. Ser qetlîama 9ê Çile 2013î ra zî hîrê serrî vêrdî ra. Derheqê qetlîam de, qeydê veng yê planê qetlîam, fermanê kiştiş yê bi îmzayê sermiyananê MÎT, pêdiyayinê kiştoxî bi azayanê MÎT û herzewbîn xeylê delîlê bînî vejiyay. La rexmê nê belgeyan  persê ‘çima dawa destpci nêkena’, ‘Fransa çi niminena, qetlîam de rolê tirkiye çima beyan nêkena’, ‘qetlîam ser kamcî bazareyî viraziya?’ hetê Kurdistanijan yenê persayiş.

Sebebê sifteyin, piyakariya qilêrîn yê hurdî dewletan o. Herzewbîn menfaatê ekonomîk û siyasî zî sebeban ra yê. Tarix de zî wina yo. Dewletî sûc, guna û pêrokîn karê qilêrîn yê dewleta mutefîkê xo îfşa nêkenê, serê ci gênê, arşîvanê giroteyî de niminenê. Îstixbaratê Fransa, heta nika zonayişê ke destê ci de yê, nêdayê dozgero ke weyneno dosya. Rexmo ke, destê îstixbaratê Almanya de zî derheqê qetlîam û kiştoxî de belge û zonayişî estê, la Almanya nêdana Fransa û niminena. Çike piyakariya qilêrîn-leymin yê Almanya û Tirkiye zaf xorîn a. Xo ra Enqera ya ke fikir, ferman û planê qetlîam vet, cipersyayişê na dawa de, pêrokîn kêberê xo girotiyî û heta nika, ne belge ne kî zonayişî day meqemanê hiqûq yê Fransa. Çike, ê belgeyî delîlê sûcî yê qetlîamî yê. Bi no hewayî, pêrokîn dewletî, qilêrînanê jûbînî niminenê. Fransa serra 1980î ra na het, kêberê xo îstixbarat û şebekeyanê cînayet yê tirkiye ra akerd. Xeylê biyayişê qilêrîn de Fransa hemkarî kerd. 

Rexmê pêrokîn hewldayenê nimitişê sûcdaran, na dawa do biramo û aşkere bibo. Çike na qetlîam nêaysena zey qetlîamanê bîn. Çike pey na dawa de bi mîlyonî çim, goş û ziwanî estê. Şarê Kurd do pey na dawa nêvirado. Heta ke, edalet bîro ca, heta ke, kiştoxî, sucdarî cezayê biancê. A roj do bibo roja roşnî ya Fransa zî. Çike Fransa ya ke, îxtilal, şoreş û demokrasiyan rê rayverîn kerd, nika taritîyê da xorîn de ya. Her ke Fransa serê jew sûcî gêna, sûcê do bîn, qetlîamê da bîn qewimena. Cok ra, roşnîkerdişê qetlîamê 9ê Çile, him serva demokrasiya Fransa jew îmtihano, him zî taritî ra vejyayişê tîjî yo. Dewleta Fransa, rew ya zî berey, mecbûra ke na qetlîam roşnî bikero. Eke roşnî nêkero, qetlîamî dê açariyê ci. Xo ra qetlîamê 7ê Çile 2015î yê qetlîamê Charlîe Hebto, qetlîamê 13ê Mijdarî 2015î ke 130 kesan weşiya xo kerd vinî, netîceyê bêedaletî û bêhiqûqiya Fransa de viraziyay. Eke Fransa nê pêrokîn qetlîaman zelal nêkero, no sîlsîleyê qetlîaman do dewam bikero.

Ceniyê Kurd û şarê Kurd no hîrê serriyo her hefte meydanan de, qîrayişê edaletî kenê. Heta ke edalet bîro ca, no qîrayiş tekoşîn do dewam bikero. Çike Sara, Rojbîn, Ronahî, Sêwê, Fatma û Pakîze roşniyê çimê Kurdan û sebebê berzkerdişê tekoşîn, heyfgirotiş û xelesyayişê Kurdistan’î yê.