Damûstayîn de vajîya ke hinî rind fehm beno ke, operasyonê peynî yê AKP ê vera çapemeniya kurd û mûxalîf, seba nimnayişê qirkerdinê fîzîkî ê vera kurdano. KCKD-E ard ziwan ke dîktatorîya Erdogan girotişê tv û radyoyanê kurd û mûxalîf ê Tirkîye de bes nêdîyo, bi îmkananê xo ê siyasî û ekonomîk, Awrûpa de zî bi bazarîya qilêrîn Med Nûçe û Newroz TV dayê girotiş.
Qirkerdişê kurdan kenê hedef
KCDK-E hetkarînê lîmin ê mabenê Eutelsat û Erdogan-AKP û de zî enê hayderîyan da: “Yardimkarê Serokê Eutelsat ê Rojhelatê Mîyanî û Efrîka ê Mudurê bazarê enê qadan ra mesûl Tirk o. Prensîbê hiqûqî û qanûnî eştî jû kişt û Med Nûçe girot, dima zî Newroz Tv hedef girot. Eno zî hetkarînê lîmin ê mabenê Eutelsat û dewleta tirk de rafîneno çiman ver.”
KCDK-E ard ziwan ke, enê hetkarînê lîmin ê vera televzîyonanê kurd de, gîşta heveyê dewletanê Awrûpa zî esta û vat: "Şîrketê Eutelsat xizmetkarînê faşîzmê AKP keno. Hedefê AKP qirkerdiş o. Verê qirkerdişan wazena çapemenî bêveng bikerê.” KCKD-E vera taloke û hetkarînê lîmin wina veng da Kurdistanijan: “Dewleta tirk qirkerdişê kurdan plan kerdo. Çarçoveyê siyasetê qirkerdişî de, televîzyon û radyoyanê kurd gêna. Ewro televîzyon û radyoyan gêna û do meşt qirkerdiş virazo. Coka lazimo, şarê ma û dostê ma, heme cayan de vejîyê meydanan û Eutelsat û hetkarînê lîmin protesto bikirê.
Destpa çalekîya roniştenî kerdî
Heto bîn ra rojnamevanê ke TV û radyoyê ci girotiyayê Amed de destpa çalekîya roniştişî kerdî. Çalekîya ke bi rayverîna Cemiyetê Rojnamevananê Başûr-Rojhilatî de, vizêr dest kerd ci, do 3 rojan biramo. Xeylê rojnamevanî zî desteg danê çalekî. Damûstayîna pîyayî ra dima rojnamegeran kamera, makîneyê fotograf û mîkrofonê xo waro ronay û dest bi çalekî kerdî.
NAVENDÊ XEBERAN