Vera tecrîdo ke Rayberê Şarê Kurdî Abdullah Ocalan ser o yeno domnayene de seylî bajaranê Ewropa de kurdistanijî û dostê înan vejîyayî kuçeyan tecrîdê serê Ocalanî şermezar kerd û xoverdayîşê grevê vêşanîye û rojeyê mergî silam kerd.
Bajarê Hamburgî yê Almanya de Kurdistanijan merkezê bajarî de bi çalakîya rêzela merdimî bale ante xoverdayîşê grevê vêşanîye û rojeyê mergî yê ke rayberîya parlamentera Colemêrgî Leyla Guvene de semedê wedartişê tecrîdê serê Rayberê Şarê Kurdî Abdullah Ocalanî yenê viraştene ser. Mannheîm de zî rayberîya Meclîsê Cinîyan ê Ronahî Berîvane û Merkezê Komalê Kurdî de çalakîyêk ameye organîzekerdene.
Koln de kurdistanijî vernîya Kilîseyê Domî de ameyî pêser û vera tecrîd, grevê vêşanîye û rojeyê mergî, bêvengîya welatanê Ewropa şermezar kerde. Cinîyan tîyatroyê kuçeyî de kayê hîrê meymunan kay kerd û vengda dezgehanê Ewropa ke wa bêveng menanê. Bajarê Freîburg de hetê Meclîsê Cinîyan ê Nûda û Merkezê Komelê Kurdî yê Demokretîkî ra çalakîya xeyme ameye viraştene. Bajarê Baselî yê Swîsre de bi çalakîyêk bale ame antene serê rojeyê mergî û grevê vêşanîye. Platformê Paştdayîşê Grevê Vêşanîye çalakîya roniştişî organîze kerde.
ANF / BRUKSEL