Kurdê ma Êzîdî kewtî rayan vanî, “Ma şinî Ewropa û ma uca de xelîsîyênî.” Zafê kurdê ma sey şarê ma yê Kurdê Êzîdî fikir kenî û wazenê şîyêrenê Ewropa.

Ez her roj yew welatê Ewropa de Kurdên hina yê Bakur,Başur, Rojhilat û Rojavayê Kurdîstanê vînena. Zafêrê înan ra qisey kena. 

Ez înan ra pers kena vana,  “Şima çira ameyê Ewropa?”. Vanî, “Şer esto, hetê aborî de îdarê nêbenê. Ez nê sedemên ra mecbur menda û ameya.” 

Ez reyna pers kena vana, “Şima hetanê  resayê  Ewropa, şima çiqasî pere mesref kerdo. Hema hema her kes vano,  “Mi 10.000 û 15.000 ( des û pancês hezarî )euro mesref kerdo, ez hina resaya Ewropa.”

Pirsê xo dewamkena û vana,  “Şima pê nê pereyan eşkenî çend serrî îdare xo bikerênê?”

Kurdê Rojavayê Kurdîstanê(hema hema zafêrê înan zî ciwanî) vanî, “Ma eşkenî en tayê 10 serrî îdare xo bikeri.”

Ez ucaxî înan ra vana kî, “Şima çira ameyê û şima çira raşt qiseynêkenî. Şima çira welatê xo terkkênî? 

Rojava û Başûrê Kurdîstanê keye estî, en tayê 20 şehîd dawo. La keye şima de ne yew tekoşîn keno, ne zî gureyê welatparêzî keno. Şima zî yenî Ewropa û fek welatê xo ra verêdanî.” Nê qiseyan ser yewê înan vengê xo nêvejeno.

Nika zî Kurdê Êzîdî, Bakurê Kurdîstanê ra kewtî rayan, sere însanî en tayê 2.000(di hezarî) euro dawo şebekeyan, vanî ma şinê Ewropa.

Ez ewnêna resmê înan giranîyê înan kênekê û lajêkê ciwanê. Nê ciwanî qey Şengal bîyero rizgarkerdiş, verênîyê qirkerdişê bîyero girewtiş, çîyêk nêkenî. La verê xo danî Ewropa. Ciwanîyêk hina nêbeno. Ciwanê hina senî eşkenî vajênê ma Kurdê Êzîdîyê, ma Kurdê Rojava û Başûrîyê. Şarê xerîb Amerîka, Awustralya, Almanya, Îngîlîstan ra wirzenê û şinê Rojavayê Kurdîstanê de şehît kewnî. La nê ciwanê remênî şinê Ewropa.

Ciwanê hina vanî, “Ma xo Ewropa de xelisnenî.” Hina fikir kenî.  Hemi hetan ra xeletîyanê gird de yê.

Welat û erdê xo terkkerdiş, kok û ristim vînkerdişo. Çend serrî biverîyo, giranîyê înan hetê çand û zimanê de helîyenî.  Eleqê înan û şarê kurd û Kurdîstanê nêmaneno. Kamcîn welatê Ewropa de ciwîyenî, benî sey însanê uca. Tut û domanê înan binî ra çand û zimanê xo  û Kurdîstanê ra dûrîkewnî. Bi wextî ra qirbenî.

Tîya de na raştî vejîyena werti.  Ewropa xelasî nîya. Roj bi roj qirkerdişa. Qey Kurdê Êzîdîyan hina ya. Qey Kurdê Rojava zî hina ya. Qey Kurdê Bakur, Başûr û Rojhilatê zî hinaya. 

Çîyo en raşt oyo ke, şarê ma Kurdîstanê de bimano û Kurdîstan bipawo.