ZEYNEP KURAY / ANF/STENBOL
Hemşaredarê Bajarê Girdî yê Amedî Selçûk Mizrakliyî tepiştişê xo ra ver talankerîya qayûmî û dagîrkerîya dewleta Tirkî ya serê Vakur û Rojhelatê Sûrîye ser o qisey kerdbi.
Mizrakliyî va ‘eke şima biewnê ci vînenê ke wexto ke nê hedîseyî qewimîyayêne prosesê binpaykerdişê heqanê merdiman, binpaykerdişê demokrasî û azadîye û binpaykerdişê huqûqê merdiman ameyêne ciwîyayene’ û wina va: “Merdim vîneno ke no proses de heme erjê huqûqî û yê demokrasî werte ra ameyî wedartene.”
Mizrakliyî dîyar kerd ke nê pêro, Tirkîya mabênê tarîtîya Rojhelatê Mîyanênî de fînenê zereyê tunelêkê bêpeynî ke no tunel kesan zereyê xo de keno vinî û va: “Êyê ke hewl danê bi taybetî Kurdan nê tunel de vinî bikerê bi xo yenê vinîkerdene.”
Îqtîdar sîyasetê ‘wa Kurdî rehetê nêvînê’ keno
Mizrakliyî da zanayene ke îqtîdar hem zere de hem zî teberê welatî de sîyasetê ‘wa Kurdî aram nêbê’ keno û seba naye zî her rayîr û metod xebitneno. Mizrakliyî CHP zî rexne kerd ke destûrnameyê şerî tesdîq kerd. Mizrakliyî îfade kerd ke sazkerdişê îttîfaqê aştîye û demokrasî eşkenê na rewşe bixelisnê û wina va: “Yan sîstemêkê aştîya Tirk û Kurdî ra seba ameyoxî bêro sazkerdene yan zî heta ke Tirkîya Kurdan reyde pê nêkero tena bimana û bikewa mîyanê xizanîye. Zaf dûr nîyo ke no zîhnîyeto qedexekar welat bivurno rejîmêko zorbaz.”