Hemverfeka HDK Gulistan Koçyîgîte û Serokwekîla Koma HDP Filiz Kerestecîoglû derheqê qedexekerdişê Ewropa yê mîtînganê AKPyî de qisey kerdî va day zonayen ke çîyê ke vera AKP benê, AKP bi xo zî Tirkîye de kena.
Koçyîgîte hayr ant prosesê referandûmî ser û wina va: "Hukmat herinda çîyê ke lazim bî bikero de heme rêxistine û sazîyanê cinîyan pada. Ma rewşêka winasî de ver bi referandûmî şonî. Tabî merdim nêeşkeno tîya de qala demokrasî bikero. Cayo ke OHAL tede bibo ewja de referandûm û qanûno bingeyî nêbeno. Seba viraştişê qanûno bingeyî ganî OHAL bêro wedarnayîş.”
Raştîya xo reyde têrî bimane
Koçyîgîte bale ante pratîkê AKPyî ser û wina va: “Nika bi hezaran sîyasetmedar û rojnamegerî hepisxaneyan de yî. Ganî hukmat verê raştîya xo reyde têrî bimano, ganî hukmat zulmo ke welatê xo de şarê xo rê keno reyde têrî bimano û dima ra bêro qala raştîya sewbîna welatan bikero. Polîtîkayê ke hetê AKPyî ra ameyî meşnayîş, bîyî sebeb ke welat vîzyonêko gird vinî bikero. Eke welatêk şîyayîşê wezîrêk yê Tirkîya qedexe bikero, o wext ganî AKP xo de muhakeme bikero. Ganî biperso ka mi kura de şaşî kerda ke Ewropa şîyayîşê mi qedexe kena. Tabî ma qedexekerdişî tesdîq nêkenî, labelê wa hukmat baş bizano ke eynî çîyî welatê ma de zî qewimîyenî. Bi hezaran karmendî bi KHKyan ameyî îxraçkerdiş û pasaportê înan ame betalkerdiş. Ma no zî qedexkerdiş nîyo?”
Meydanan şarî rê qedexe kenî
Koçyîgîte vist vîrî ke ‘Tirkîya nika bîya hepisxaneyêko nîmakerde’ û wina va: “Hukmat nêwazeno nêyî bivîno û wexto ke çîyêk vera hukmatî de qewimîyeno, qiyamet qerfneno. Çimkî hukmat xo sey hewarîyê demokrasî vîneno. Nika AKP zaf teng bîyo; hem teberê welatî de û hem zereyê welatî de sîyaset de tengasî anceno. ”
Koçyîgîte dewamê qiseykerdişê xo de hayr ant polîtîkayanê zerreyî yê AKP ser û wina va: “Wexto ke teyaraya Çavuşogluyî ameye astengkerdiş, şinaseyêk sey Hîtlerî kerd. AKP hukmato ke polîtîkayê antîdemokratîkan yê welatê xo nêvîneno. Şima bi seyan sazî û dezgehan padayî, hemserekanê HDPyî eşt hepixaneyî. Bes nêbî şima parlamenterîya hemsereke zî betal kerd. Eke Hollanda bi qedexekerdişê şîyayîşê Çavuşogluyî bena sey Hîtlerî, o wext ma do qedexe û qetlîyamê ke Kurdistan de bîyî, senî şinase bikerî. Ma do Cizîr, Sûr, Nisêbîn, Gever û Silopî senî şinase bikerî?”
Awrûpa Tirkîye nê, AKP’yî red kena
Serokwekîla Koma HDP Filiz Kerestecîoglû zî vist vîrî ke welatê Awrûpa Tirkîye nê AKP red kena û aşkere kerd ke AKP seba ke referandûmî de ‘Ya’ bivejyo vera herkesî de şer da destpa kerden.
Kerestecîoglû ke meclîsî de kombîyayîşê çapemenî viraşt û aşkere kerd ke hikûmet hemwelatijê ke teberê welatî de ciwîyenê û dê vengê ‘Nê’ bidî zey ‘terorîst’ îlan kerdo. Filiz Kerestecîoglû vist vîrî ke seba ke referandûmî de ‘Ya’ bivejyo, yew ca nêmend ke şer îlan nêkerdî û wina va: “Hikûmet do heta referandûmî vatişê ‘faşîst Awrûpa’ zey malzeme kar bîyaro. Esasê mesele de Tirkîye nê, AKP’yî yena red kerdiş. Şima no welatî açarnenê welatekê bê ewle. Şima bi nê polîtîkayan zerar danê ekonomî û îtîbarê welatî qedênenê.
‘Bîlançoyê MY
Serokwekîla Koma HDP Kerestecîoglû hayr ant îzahatê îxlalanê heqê merdiman yê Neteweyê Yewbîyayeyî (Operasyonê ke Kurdistan de virazîyay de 2 hezar kesan weşîya xo kerd vinî) ser û da zonayen ke no bîlanço, bîlançoyê AKP yo.
ÎZMÎR / ANQARA