Hunermenda kurde Eyşe Şane ke bi vindetişê xo vera zîhnîyetê camêrdî de têkoşîn dayo û bi hunerê xo zî hişê kurdan de cayêko gird girewto, 18ê kanûne ya 1996î de nêweşîya rîşa merdimwere ver merdbî.
Serrgêra 20. yê wefatê Eyşe Şane de awankaranê MKMyî ra Mustafa Borak û keynaya Eyşe Şane Yasemîn Turane derheqê hunermende Eyşe Şane de qisey kerdî.
Eyşe Şane zaf ameyêne heskerdiş
Borakî qiseykerdişê xo de va ‘mi serra 94 de wextê awanbîyîşê MKMyî de Eyşe Şane şinasna’ û qiseykerdişê xo wina domna: “Eyşe Şane zaf ameyêne naskerdiş û heskerdiş. Her çiqas ke hende zehmetîyî antî, reyna zî fek hunerê xo ra veranêdaye û hunêrê xo de vejîyaye duştê tewr berze. Reyna her çiqas ke keyeyê aye nêwaştêne zî Eyşe Şane bi vindetişê xo vera zîhnîyetê feodalî de têkoşînêko gird da. O wext seba deyîr vatişê yew cinîye munasîb nêbî, la Eyşe Şane no het de deyîrî vatî û serkewte. Deyîrbazê sey Eyşe Şane û Şakiroyî temsîlkarê hunerê kurdan î. Ganî ma mîrasê înan rê wayîr bivejyî.”
Tim hesretîya maye û welatî antêne
Keynaya Eyşe Şane Yasemîn Turane zî va ‘maya mi tim hesretê welatê xo bî’ û qiseykerdişê xo rê wina dewam kerde: “Maya mi wexto ke vera kurdan de çîyêko nebaş bîyêne, zaf eciz bîyêne û roniştêne bermayêne. Maya mi ciwîyayîşê xo de tewr zaf hesretê dayîke û welatê xo bî û wesîyet kerdbî ke wexto ke bimiro, verika maya xo de bêro definkerdiş, la nê wesîyetê maya mi nêame ca. Maya mi zaf girêdayeyê erd û kulturê xo bî. Hunerê aye mi rê mîras mend û ez zî vîrardişanê aye ra beste virazena.”
AYŞE SURME / DÎHABER / ANQARA