Kesê ke par xoverdayîşê xoserîye yê Nisêbînî de şehîd bîyî, cenazeyê înan hîna nêdîyayo keyeyê înan. Bi hawayo zelal nêbo zî seke yeno zanayîş 83 kesî netîceyê pêrodayîşan de şehîd bîybî û nînan ra tena cenazeyê 35 kesan teslîmê keyeyê înan ameybî kerdiş. 48 cenazeyî bajaranê cîya-cîyayan de goristanê bêkesan de ameyî definkerdiş. 2 cenazeyê hewteyê peyênan de ameyî vetiş zî Stenbol de goristanê bêkesan de defin bîyî.
Nê cenazeyan ra 2ê ci torin û birazayê Latîfe Akyuze yî. Herçiqas ke cenazeyê torinê Latîfe Akyuze Mehmet Şîrîn Akyuz û birazayê Latîfe Akyuze Îbrahîm Akyuz herçiqas ke netîceyê testê DNAyî de ameyî dîyarkerdiş, reyna zî her di cenazeyî zî goristanê bêkesan de ameyî definkerdiş.
Babete ser o Latîfe Akyuze qisey kerde û vera nêyî de reaksîyon nîşan daye.
Her di zî ewja de ameyî definkerdiş
Latîfe Akyuze va ‘netîceyê pêrodayîşan de Mehmet û Îbrahîm cayanê cîya-cîyayan de şehîd kewtî’ û wina dewam kerde: “Her di zî heta qedexeyo peyên zere de bî. Îbrahîm Taxa Zeynel Abîdînî de, Mehmet zî Taxa Abdulkadîrpaşa de şehîd kewt. Pêrodayîşan ra dima ma bi aşman nêzana ke cenazeyî berdî kura. Ma nika ra 6 aşmî verê cenazeya Mehmetî, aşmêkî verê zî ma cenazeya Îbrahîmî dî. Herçiqas ke hende aşmî derbaz bîyî, reyna zî ma hîna cenazeyê xo nêgirewtî.” Akyuze dewamê qiseykerdişê xo de dîyar kerde ke aye demêko derg o ke bi hesretîya mezelêkî cuyena û qiseykerdişê xo wina domnaye: “Derheqê cayê definbîyayîşê cenazeyan de daxî dewlete qerar dana. Merdimê ma wazenî cenazeyan Goristanê Hececa de defin bikerî, labelê Qeymeqamîye mi ra va ‘Goristanê Hececa qedexe yo’. Labelê ganî bi hawayo lez no qedexe bêro hewanayîş.”
Merdeyê ma ra daxî tersenî
Akyuze dewamê qiseykerdişê xo de va ‘dewlete hem ma ra hem cenazeyanê ma ra û hem zî goristananê ma ra tersena’ û wina qedênaye: “Ewro goristanan daxî ma rê qedexe kerdo û destûr nêdanî ke ma kerraya mezelanê xo daxî bivînî. No tena Tirkîya de esto, bêxera Tirkîya ti cayêkî de çin o. Verê şeran de daxî seba girewtişê cenazeyan mabên dîyayêne şeran, labelê ewro îşkenceyê cenazeyanê ma kenî. Çira destûr nêdanî ke merdimî şêrî goristanan? Derdê Erdoganî mezelan reyde çî yo? Merdeyanê ma ra daxî terseno.”
JINNEWS/MÊRDÎN