Tarîxe însanetîye ra ez esta. Ez kenaya babî û dadîya xo ya, waye birayê xo û waya waye xo ya, cinîya mêrdeyê xo dadîya qicananê xo, ez emikeya, ez xalikêya, ez xalcinîya...
Ez cinîya, ez no sîstemê dînya de nîmeya. Hetê camerdan ra hetê dewletan ra ez kema. Goreya her wext cinîtî kemasî ya. Nê.. wîna nîya !!! Aqilê mi to ra kem nîya fikrê mi zî esta sey to û linganê mi, çimanê mi, destê mi esta sey to. Ez zî merdima. Estbîyayişe mi bedenê mi de ruh girewta sey camerdan!
Ez cinîya, ez her çeşît zulm vînena , ez kîşîyena, ez kuwayena, ez îşkence vînena.. Ez Silopîya de bena Taybet Inan; qezaya Şirnaqê Silopîya de hetê dewlete Tirkiya kîşîyaya ez, sereyê rahar de pe mermîyê polîsan. Cendegê mi erde de menda yew hewte.
Ez Istanbolê de bena Dîlek Dogan: Ez zereya keyeye xo de mîyane ode de hetê polîsê dewlete kîşîyaya ez, emrê mi vîst û çahar de qedîya.
Ez Mûş de bena Ekîn Wan; qezaya Mûşê Gimgim de hetê dewlete Tirkiya kîşîyaya ez, leşkere Tirk bedenê mina cendegê kerda zit û eşkera kerda.
Ez Mersîn de bena Ozgecan Aslan; qezaya Mersînê Tarsus de hetê hirê hebi camerdî faşîstan kîşîyaya ez, bi îşkence û bi tecawûz...
Sereye bedenê mi de tena heqa mi esto. Îşkence û tecawûz zulmê ko pîlo bedenê mi de. Ez zanena nê rewşan de bare dewlete Tirkiya zaf o. Eger ke dewlete wahare cinîyan bivejo wina nêbeno. Labelê zîhnîyeta dewlete zî camerda. Bi taybetî îqtîdarê AKP ra pe zulm kerdîşê cinîyan bolage biyo. Qey? Cunke; goreya fikrê dewlete û îqtîdarê AKP cinî gereka tena zereye keyeye de cinîya mêrde xo û dadîye qicanê xo bibo. Sîstema dewlete Tirkiya de hûqûqê ûsulê ceza hetê cinîyan de nîyo sey yew xelate hetê camerdan de yo.
Serra di hezar û di ra pe îqtîdarê AKP de qetlkerdişê cinîyan roje bi roje zêdîya. Kişîyayişê cinîyan hem hetê dewlete ra hem zî hetê camerdan ra beno. Xora cezayê dewlete çinîyo, cezayê camerdan zi hetê dewlet ra tim û tim kemîyeno.
Gelo cinîyan ma se bikero? Gereka ma bi têhet û verba faşizma dewlete, tekoşînê xo xurt bike! Gereka ma her ca de zereyê keyeye de teber de heq û hûqûqê xo bipawe! Gereka ma veng û rengane xo her ca de eşkêra bike! Gereka ma her wext de û her ca de organîze bibe! Heta ke tekoşînê û yew bîyene ma nêbe, na zulmê dewlete Tirkiya cinîyan ser de nêqedîyeno. Hîşarê xo bibî û xo vera medî...