Astsubay Semîh Ozbey 17ê êlule 2015 de hetê HPGyîyan ra amebî berdiş û o wextî ra nata ti xebere Ozbeyî ra nîna girewtiş. Pîyê Ozbeyî Serekê Heyetê Îdareyê Borsaya Tîcaretî yê Meletî Gursel Ozbeyî babete ser o qisey kerd.Ozbeyî va ‘16 aşmî yo ma Semîh ra ti xebere nêgirewto’ û wina domna: “Ma aye roje ra nata sey merde gêrenî û travmayêka gird cuyenî. Ez roja ke lajê mi hetê HPGyîyan ra ame berdiş ra nata tim seba ke operasyonî bivinderî, têkoşîn da. Heta seba ke operasyonî bivinderî ez bîya tirso ganî. Mi heta nika têkoşînê xo tim domnayo.”
Bi aştî mumkin o
Ozbeyî dewamê qiseykerdişê xo de va ‘mi çend reyan Serekwezîr û Serekkomarî reyde pêvînayîş kerd û seba qedênayîşê şerî mi înan ra waşt ke wa reyna biagêrî prosesê çareserî’ û wina va: “Labelê çi heyf ke her di hetî zî şerî domnayî û ma heta ewro ameyî. Tena waştişêk mi esto; wa leşker û polîsê ke amebî girewtiş, biresî keyeyanê xo. Rayîrê nêyî zî aştîye ra vîyareno.”
Ozbeyî peynîya qiseykerdişê xo de wina va: “Demê peynî de vanê ‘ma do Qendîlî ser de operasyon bivirazî.’ Mi Serekwezîr û Serekkomarî ra zî va, domanê ma ewja de yî. Eke çîyêk bêro sereyê domananê ma, ez do mehşer de şima ra gerrekar biba. Ma wazenî wa domanê ma bi hawayo sax teslîmê ma bêro kerdiş. Nika ra pey ez nêwazena ke lajê mi leşkerî bikero.”
DÎHABER/MELETÎ