Kisenê. Tertele kenê.
Lesanê ma vêsnenê. En peyecoy Roboskî.
Dewanê ma vêsnenê.
Bi hezaran însananê ma erzenê zerre.
Serranê domonanê ma kenê berz dardêkenê.
Serranê kokimanê ma danê waro, darde kenê.
Bombu vornenê ma ser. Pê axu ma kisenê.
Meyîtanê ma xoza de verdanê. Meyîtanê ma suke bi suke fetelnenê.
Cendeganê ma araban ra giredanê, kaskenê.
Cendeganê ma qontrol kenê, sunet bîme nêbîme.
Ma seweta serbestîya xo dame pêro. Ma seweta welatê xo dame pêro.
Ma endî teslîm nêbeme. Se kenê bikerê!
Adirê ma sima kî vêsneno. Laşerê ma bendanê sîma de nevindeno. Dêsanê sima saneno xo ver beno. Sima naye famnêkenê!
Ma some! Na biraryîya zulmî yê sima bo, ma some!
Ma verva na zulmê sima vilê xo ronêname. Sima naye 40 serrî yo famnêkenê!
Herhal mi kitavê helbestvanê pîlî Hafiz de wendî bî. Rozê jû dewrês sono çê jû axayî. Movet kenê, dewrês lawiku vano. Axa pê çîyê qayîl nêbeno, ferman dano mordemanê xo vano dewrêşî berê rutûrupal kerê, kutikî ci verdê va pirtley kero. Mordemê axayî dewrêşî kenê rutûrupal kutikî verdanê ra ser. Dewrês dest erzeno kemeru, kemerî pêro cemedîyê dest ra nînê. Dewrês naye ser vano, ‘halla halla çi xezebê heqî, nînan kemerî giredê, kutikî verdê ra, çi keder îlahîya heqî!’
Axa balkon de na vatîsê dewrêşî gosdano, cirê wes yeno. Onca ferman dano mordemanê xo vano ‘kutikî bivindarnê, dewrêşî bîyarê zerre mal, milk, pere çi wazeno ci dê.’ Mordemê axayî dewrêşî ra naye vanê. Dewrês vano ‘ez sima ra tewa nêwazen. Kincunê mi bidê mi ez xorê îta ra şerî, malûmilkê dîna yê sima bo.’
Yê ma kî bîya na fênde. Sima de biraryîye nêbena! Ma teslîm nêbemê, some!