BENGÎSU KOMURCU/DÎHABER/STENBOL
Sucê ke bîyî sebeb ke Akademîsyene Nurîye Gulmene û Semîh Ozakça karê xo ra bêrî îxraçkerdiş ra yewe zî beşdarbîyayîşê çalakîya ke seba Berkîn Elvano ke wextê Xoverdayîşê Gezî de hetê polîsan ra amebî qetilkerdiş bî.
Dayîka Berkînî Gulsum Elvane seba ke piştî bido çalakîya Nurîye Gulmene û Semîh Ozakçayî roja îne beşdarê çalakîye bîybî. Gulsume wextê çalakîye de hetê polîsan ra ameybî derbkerdiş û dima ra tepişîyaybî. Wextê derbkerdişî de polê aye şikîyabî. Gulsuma ke eynî şewe serbest veradîyaye, qisey kerde.
Ez nêşena vînî bikera
Gulsum Elvane va ‘wextê çalakîye de ma rojnamegeran reyde sohbet kerdêne û polîsan mudaxale kerd’ û wina domnaye: “Sifteyîn hêrişê kênaya mi kerdî û dima ra mi zî paşkul da polîsan ro. Polîsan bi vatişê ‘ti senî dana polîsê tirkî ro’ hêrişê mi kerdîy. Mi domanêkê xo vînî kerd, la ez nêşêna yewna domanê xo vînî bikera. Ez û keyeyê mi hetê polîsan ra hedef ameyî nîşandayîş. Herçiqas ke mi polîsan ra va ‘polê mi şikîyayo’ reyna zî bi hawayo çep kelepçe dayî polanê mi ro. Wexto ke dîyî ke polê mi masayî, waştî kelepçe biakerî, na rey kilît nêdîyî. Dima ra têlî reyde kelepçe akerdî. Doktorî vanî ganî ti amelîyat biba.”
Her roje helîyenî
Elvane va ‘edalet çin o û ma seba ameyoxa domananê xo têkoşîn danî’ û wina dewam kerde: “Berkînê mi 259 rojî nêweşxane de mend. Mi her roje helîyayîşê lajê xo temaşe kerd. Nika zî bedenê Nurîye û Semîhî helîyeno. Ez newe ra eynî vîstan cuyena. Tena polê mi nê, heme cayê mi zî bişiknî, ez heqdar a û ez cayê xo de nêvindena. Ez do heta peynî seba domananê xo têkoşîn bida. Tena ziqaqan de nê, ma eşkenî heme ca de veng bivejî. Ez nêşêna bivindera. Eke şima dest bidî yewna domanê mi, êdî çimê çîyêk nêvîneno.”