ERSÎN OZGUL / SEMRA ACAR / PÎRHA / ÎZMÎR
Bi nameyê Gulcan Akin Felekogluye de cinîya ke Îzmîr de cuyena, karê asinkarîye kena. Gulcane 12 serrî yo nê karî kena û dana zanayene ke destpêkerdişê karî ra dima tayînan aye ra vato ‘no karê camêrdî yo, çira ti nê karî kena’ labelê aye karê xo domnayo.
Gulcane vana ‘ez seba ka Kawayo Asinkar ra tesîr bîya’ û wina domnena: “Mêrdeyê mi zî asinkar o. Merdimê asinkarî merhametin î. Çimkî asinî ser o xebetîyenî û heme hêrsê xo asinî ser o bikar anî. Mi zewijîyayîşê xo ra dima dest bi nê karî kerd. Wexto ke mi Gimgim de nê karî kerdêne, ez zaf reyan raştê zextanê komelkîyan ameya. Labelê mêrdeyê mi tim destek dayêne mi. Ez bi kêfweşîye karê xo kena.”
Gulcane wina dewam kena: “Ez hetêk ra zî ser asinî de xebetîyena û hewl dana tayê çîyanê bînan biviraza. Ez wazena bawerîya xo ser o tayê sembolan viraza. Sey nimune, ez wazena Mîlçika Qulingî viraza. Çimkî elewîyan de na mîlçike sey sembolî ya. Xora bawerîya ma bîye sebeb ke ez nê karî bikera. Bawerîya mi de tebîet rê eşq esto, rêzgirewtene esto. Wexto ke ez virazena zî nînan esas gêna.”