Ez raywan a. Raywana rayanê welatê xo. Raywana ko, gelî, gerîs, deşte, dewe, bajaranê welatê xo. Vakur, Başur, Rojawan, Rojhilatê welatê xo. Seba nê cengê qefçilî înadê nê cengê qefçilî ginaya rayan ro. Qeraxê çemê zerrîya waştiyan ra vîyaren. Înadê nê cengî şîîranê wisarê welatê mi ra parzûnkerdiyan wanena. Ne vana şewe ne vana roje. Şîîran wanena ez. Înadê nê cengê qefçilî vana şîîr. Înadê nê cengê qefçilî kîşta lewanê domananê qemeran de raye ra şon. Pêşmiriyayîşê kîşta lewanê domananê qemer ê welatê min ê qemerî kena huyayîş. Bena şada dinyaye. Huyena ez.
Ez înadê nê cengê qefçilî bê qefelîyayîş dosere de wurzena ra. Vayo honik ê welatê mi porê mi vaydano. Pawayê tîje manena ez. Verê xo dana tîje keleyê xo birnena. Her lêlê şodirê welatê xo de tîje ra çekuyan zaynena. Çekuyanê nê ziwanê şîrînî. No ziwano ke binê postalanê zaliman de mendo. Vayê lêlê şodirî to rê ruşnena ez. To rê ruşnen ke to bivilêno. To rê ruşnen ke royê to biarasno, aram bikero. To rê ruşnen ke dejê ke mi dayê to bivîyarno. Hesreta to rê bibo dermanêk. Zerrîya to ya pirîdej, pirîjan, pirîxem, pirîkeder, pirîrenc û ezeb rê bibo heval û hogir. Zerrîya to ya tenike rê.
Ez înadê nê cengê qefçilî ginena rayan ro. Rayan virazena. Seba şodirê domananê welatê xo û pêro domanan ginena rayan ro. Ginena rayan ro ke ê bi ziwanê xo biwane. Dejê ke ma antî ê meancê. Travmayê ke ma dîye ê mevînê. Ê pê xo de nîyamederê ka doçikê înan esto ya nê. Ê bibê şaîr. Ê dejî rê nê, ê waştîyan rê şîîran binusnê. Ê bişîkîyê kewe bihuyê. Huyayîşê înan çeman bivinderno. Huyayîşê înan bibo awe biheriko. Biheriko hêga û merganê Kurdistana ma. Hega û merganê Kurdistana ma awbido. Mergo bê wext înan ra dûrî bo. Ê mirdiya xo bicuyê. Tenê mecuyê. Azad bicuyê. Bi mane bicuyê. Cuya înan ra mane biherikîyo. Royê înan tim asmên de fir bido. Zerrîya înan bi heskerdîşî pir bo. Her wisar newede aşiq bê. Her wisar bizêdê û bi xo ra bizêdnê.
Ez înadê nê cengê qefçilî rindekîyan arê dana vil û gulanê koyanê welatê xo ra. Vil û gulê ke bi astereyanê welatê min ê bindestî ameyê awdane…