BERLÎN: Paytexta Almanya Berlîn de Kurdistanijî, çormeyê şoreşger û şarê Tirkîyeyî roja Şeme seat 14.00î de Brandenbûrger Torê de are bî. NAV-DEM, Meclîsa cenîyan ya DEST DAN, Ciwanên Rojava, PYD ya Berlîn, Partizan, ATÎK, AWEGKOM, Cemaeta Dersimijê Berlîn, Înisîyatîfa Azadiya Dersim, Rêxistinên antî-faşîst ê Elman û Parlementerê Eyaleta Berlîn yê Partiya Çep (Die Linke) Hakan Taş ra pîya xêlê kesê xoser zî tewrê mîtînga antî-faşîst bî.
Mitîngî de nûmayişkaran bi slogananê zey “No Pasaran”, “Ma ray nêdanê faşîzmî”, “Bimre AKP-dîktator Erdogan”, “Terorîst Erdogan”, vera terora AKP-Erdoganî hêrs û nêrazîbîyayişê xo ardî zon.
‘Teslîmê faşîzma AKP nêbenime’
HAMBÛRG: Sûka bîn yê Almanya Hambûrg de zî bi slogana “Xoverdayişî bikerime gird, faşîzmî çinî bikerime” rayşîyayişeke bi meşaleyî virazîya. Rayşîyayişa ke bi verniyîna Ciwanên Azad de taxa Sternschanze de destpa kerd, heta Dammtor dewam kerd. Nûmayişkaran bi slogan û qiseyan ardî zon ke kurdî dê ti wext teslîmê faşîzma AKP nêbê.
MUNCHEN: Munchen de zî bi tewrbîyayena seyan kesan rayşîyayişeke virazîya. Komîteyê hadreyîn ser damûstayîneke da û vist vîrî ke na nûmayiş rîwalê nêheqîya ke Tirkîye de bena virazîyena.
‘Qedexeya vera PKK wedarnê’
HANNOVER: Hannover de zî dûştê qedexeya PKK rayşîyayişeke virazîya. 2 hezar ra vêşî Kurdî û Almanî ke tewrê nûmayiş bî, waştî ke qedexeya vera PKK ke no 23 serrîyo ramena, wedarîyo. Temsîlkarê NAV-DEM ke nûmayiş de qisey kerd da zonayen ke tekoşîna serbestî yê şarê Kurd dema xo ya tewr bi heybet û tarîxî de ya. Temsîlkarî aşkere kerd ke rîwalê zilma vera Kurdan, Komara Tirkîye zî ver çinbîyayenî de ya.
Rayşîyayiş ra dima Meydanê Steîntor de mîtîngeke virazîya. Çapemenîya Alman zî nûmayiş nezdî ra taqîp kerd. Nûmayiş de herzewbîn Partiya Çep ê Elman (Dîe Lînke), ATÎK, Civaka Êzidî û xêlê dezgehanê bînî ke mesajê xo ardî zon.
Faşîzm bi yewitî qedîyeno
HELSÎNKÎ: Paytexta Fînlandiya Helsînkî de şarê Fînî, Îranî û Kurd ser vengdayişê Partîya Komunîst ya Îranî are bî û rîwalê rehîn girotişê hemserok, parlamenteranê HDP, û hemşaredaranê DBP hikûmet rê nêrazîbîyayen damûsna. Nûmayişa ke zerreyê sûk de virazîya de vajîya ke zext û zilma ke yena ferzkerdiş, encex bi yewitî û têkoşîna rêxistinbîyayî yê Kurdan êşkena bîro pûçkerdiş.
MALMO: Sûka Swêd Malmo de zî 400 kesê ke Meydanê Trîangel de are bî, verva Meydanê Stora ray şî. Nûmayişkaran zilmê AKP ya era Kurdan protesto kerdî û Yewîya Ewropa ra waştî ke vernîya faşîzma AKP bigîrê.
LA ROCHELLE: Sûka Rojawayê Kurdistan La Rochelle de zî Kurdistanijî û hereketê çep ê Fransa nûmayişa wertex ya protestoyî viraştî. Qiseykerdoxan vistî vîr ke, şexs dê HDP de wazîyeno îradeyê şarê Kurd bişikîniyo. Herzewbîn Fransa û dewletanê bîn ê Ewropa ra waştî ke vera hikûmeta AKP polîtîkayanê xo zelal bikerê.
MULHOÛSE: Sûka Fransa Mulhoûs de zî bi tewrbîyena komeleyanê Kurd, Fransayî, Tirkîyeyî û elewîyan, meş û mîtîngeke virazîya. Nûmayişa ke hezar û 200 kes tewr bî de dûştê faşîzmî venga tekoşîna pîyayî amê dayen.
BELLÎNZONA: Sûka Bellînzona Kantona Tîcîno ya Swîsre de zî bi rayşîyayişeke faşîzma AKP rê nêrazîbîyen damûsnîya û venga tekoşîna pîyayî amê kerdiş.
NAVENDÊ XEBERAN