Başûr de krîzê ekonomî her ke şono hîna zaf kûr beno. Hukmatê Başûrî kewto duştê nêdayîşê meaşê karmendan.Nuştox û Rojnameger Latîf Fatîh Ferecî krîzê ekonomîya Başûrî ser o qisey kerd.
Bi vêşanî terbîye kenî
Ferecî qiseykerdişê xo de bale ant pêvînayîşê partîyê herême û wina va: “Pêvînayîşê partîyan dergkerdişê demî ra vîşêr çîk nîyo. Hukmat û partîyê sîyasî yê Başûrê Kurdistanî bi zanayîş krîzê ekonomî virazenî û şarê herême bi vêşanî terbîye kenî. Herême de bi zanayîş meaşê karmendan nîno dayîş. Seba ke komelêko cahil awan bikerî bi zanayîş mekteban zî padaye verdenî. Bi no hawa komel ser de her tewir krîzî virazenî. Kokê krîzê ekonomî serra 2014 de mabenê Mesut Barzanî û Nurî El Malîkî de virazîya û tesîrê xo da heta roja ewro.”
Komeleyêko cahil wazenî
Ferecî peynîya qiseykerdişê xo de zî wina va: “Butçeya ke Bexda ra yeno seba şarê Hewlêrî 100 ra 53, seba şarê Suleymanîye zî 100 ra 47 yeno şirawitiş. La pere nêreseno şarê herême. Pereyê ke seba şarî yeno cîyakerdiş PDK û YNKyî rê şono. Kurdî serra 2016 de bîyî yewe û hêzê xo yê YPG û YPJ awan kerdî. Merkezê çareserîya Başûrî tena Anqara û Tehran nîyo. Kurdî ganî problemanê xo mîyanê xo de çareser bikerî. Dewleta tirk seba ke hêzê kurdan ra tersena, nêwazena PKK û PDK biresî yewbînan. Sebebê problemê Şengalî zî dewleta tirk bi xo ya; çimkî nêwazenî ke çareserî bivirazîyo. Eke PKK ra nêbîyayêne çeteyê DAIŞî şewa ke kewtî Mexmur do Hewlêr zî PDKyî ra bigirewtênê. Seba resnayîşê parçeyanê Kurdistanî, Yewitîya Neteweyî ya Kurdan ganî konferas ya zî komîsyonêk bivirazo.
SILÊMANÎ