Nûmayişê ceniyan yê 8ê Adar, Roja Ceniyanê Dinya ramenê. Ceniyê ke meydanan de yê aşkere kenê ke rexmê împaratoriya ters, ma dê kuçeyan nêterknê.
Qezaya Riha Sêwereg de zî cenî bi wesîleyê 8ê Adar vejyay meydanan. Ceniyê ke ser vengdayişê KJA Parka Agaçkan de amey pêhet damustayîn day. Nûmayişkaran bi kurmanckî, dimilî û tirkî sloganê zey ‘Bicuwe 8ê Adarê’, ‘Cenî cuwyan azadî’ berz kerdî. Azaya KJA Berîvan Çetîner nûmayiş de qisey kerd û ard ziwan ke, rixmê qedexe û qetlîaman cenî dê meydanan terk nêkerê. Çetîner veng da ceniyan ke, vejerê meydanan û her ca de tekoşînê azadî berz bikerê û wina va: “Azadiya ceniyan azadiya Rayverî ra vêrena ra”. Qandê nay ma dê her ca de haştî û azadî qîr bikerê, bicuwye xoverdayişê ceniyan”.
Tekoşîna xo ramneme
Ceniyanê Çewligij zî bi minasebetê 8ê Adar rayşiyayişek viraşt. Ceniyê ke ver bana HDP yê sûk de are bî, bi panqarta “Azadiya Rayverîn azadiya ceniyan a” heta quleyê seat ray şî. Polîsan çormeyê ceniyan de bi wesayîtanê zirxî û TOMA ablûqe girot. La ceniyê ke ina ablûqe nêşinasnay, slogana “Cenî cuwyan azadî” berz kerdî. Pey rayşiyayiş hemseroka DBP yê sûk Zeynep Yûrtsever qisey kerd û venga berzkerdişê tekoşîn da ceniyan. Parlamentera HDP yê Stenbol Huda Kaya zî vist vîrî ke, ewro pêrokîn dinya de cenî semedê qîrayişê haştî meydanan de yê. Kaya hayr ant qetlîamanê dewlet ser û ina va: “90 serriya komarî de alewî, sûnnî, tirk, kurd her çorme ra însanî ameyê qirkerdin. Zey Ekîn Wan û di embazê ma yê bînî bi teşîr kerdişê bedenê ceniyan wazenê hetê rihî de cenî û şarê ma bidê şikiten. Yê ke nay kenê, xo rê vanê “ma dîndar û mûxafazakarî yê. Kaya va, ma cenî, ma dê tekoşînê xo rixmê pêrokîn zextan biramnê. Badê damustayîn cenî reyna bi sloganan peyser ageyray ver bana HDP.
Qetlîaman rê vajime beso
Qezaya Amed Bismîl de zî KJA dewan kombiyayişan viraşt. Kombiyayişê dewa Goksu de bi desan cenî hadre bî. Kombiyayin de vajiya ke şarê kurd vera polîtîkayanê înkar û îmha xover danê. Qezaya Licê de zî rayşiyayiş viraziya. Parlamentera HDP yê Amed Sîbel Yîgîtalp nûmayiş de qisey kerd û hayr ant şîdeta vera ceniyan ser. Yîgîtalt da zonayen ke, qabê ke qetlîaman ra vajê beso û cuwyayişekê azad înşa bikerê, hayr ant berzkerdişê tekoşîn ser.
Dewlet ceniyan ra tersena
Semsûr de polîsan rayşiyayişê 8ê Adar yê ceniyan manî kerd. Ser nay ceniyan Parqa Mîmar Sînan de damustayîn day. Parlamentera HDP yê Sêrt Besîme Konca ra piya bi desan ceniyan sloganê “Cenî û îsyan”, “Cenî, cuwyan azadî” berz kerdî. Hemseroka HDP yê Semsûr Zelîha Karinca qisey kerd û qetlîamanê vera bedenê ceniyan û sûkanê Kurdistan rê nêrazîbiyen damusna. Karinca da zonayen ke, polîtîkayê herbê qilêrîn tewr vêşî zî ceniyan kenê hedef û aşkere kerd ke, zihnîyetê serdest çarçoveyê stratejiyê herb de taktîkê ‘sifte ceniyan ro dê’ rameno. Parlamenter Konca zî behsê tarixê 8ê Adar kerd û hayr ant ceniyê ke Sîlopî û cayanê bîn de amey qetilkerdin ser. Konca vist vîrî ke dewlet ceniyan ra tersena.
‘Azadiya ceniyan azadiya civakî ya’ Navendê Riha de zî bi tewrbiyena Parlamentera HDP yê Riha Dîlek Ocalan û temsîlkaranê siyasî rayşiyîn viraziya. Nûmayiş de panqartê “Azadiya ceniyan azadiya hometî ya”, “Ekînan ra heta Sêvêyan bi rihê xoverdayiş xoserî înşa kenime” abiya û sloganê zey “Cenî cuwyan azadî” berz bî. Qezaya Riha xelfetî de zî temsîlkarê KJA bi ceniyan taxa Sutveren de amey pêhet. Dîlok de zî ceniyan bi wesîleyê 8ê Adar ceniyanê tepişte ra qert rusnay. Îta de damustayin ame dayen û înşakerdişê girotxaneyanê newî rê nêrazîbiyen ame musnayen.
Roja ceniyan de şîdeta dewlet
Stenbol de zî cenî serva ke tewrê mitîngê 8ê Adar bibê meydanê Kadikoy de are bî. Hemseroka HDP Fîgen Yuksekdag zî tewrê nûmayiş bî. La polîsan êrişê ceniyan kerd û şîdet ramit. Ser nay, xoverdayişê ceniyan vilayê pêrokîn kuçeyan bi. Ceniyê ke barîqatanê polîsan ravêrnay bi panqarta “Ferman yê Seray, îsyan yê ceniyan o” ray trafikî rê girotî û xoverdayişê ceniyanê kurd silamî kerdî.
Enqera de zî bi seyan cenî rexmê qedexeyê walitî cenî vejyay meydanan, serva haştî û azadî bû jû veng. Qiseykerdoxa Platformhe Ceniyan yê Enqera Serpîl Parmaksiz aşkere kerd ke, ê zey ceniyê her kamî, mîlet hu îtiqatan serva emeg, haştî û azadî xover danê. Sûkanê Kurdistan û Tirkiye yê zey Sêrt, Edena, Manîsa, Hatay, Îzmîr û xêlê cayanê bîn de zî çarçoveyê 8ê Adar de aktivîte û nûmayişê ciya viraziyay û mesajê berzkerdişê xoverdayiş ceniyan ra ame dayen.
NAVENDÊ XEBERAN