Şorişê Rojawanî ke heme dinya rê bî nimûne, xeylê bawerî û nîjadan ra heme hetê cîhanî ra merdimî ca girewtî û têkoşîn dayî. Kurd, tirk, ereb, suryanî, ermenî, îngîlîz, rus, alman û sewbîna cîya cîya şaran ra şerwanî bedel dayî. Nînan ra yewe zî Fermandarê TKP/ML- TÎKKO yê Rojawanî Orhan Bakirciyano (Nubar Ozanyan) ke eslê xo de ermenî yo.Babete ser o Komîteya Partîya Rojhelato Mîyanênî ya TKP/MLyî bi îzehetêko nuştekî da û îzehetê xo de aşkere kerd ke Fermandarê TKP/ML- TÎKKO yê Rojawanî Orhan Bakirciyan (Nubar Ozanyan) 14ê Tebaxe de resayo şehadet. Îzehetê komîte de ameyo vatiş ke ‘Fermandar Orhan Bakirciyanî cuya xo ya 40 serran ya şorişger de seba ke meşîyayîşê şorişî bihêz bikero û şerê şarî gird bikero, şer kerd’ û îzehet wina dewam kerdo: “Fermandar Bakirciyan sey şerwanêk bêters û qehreman yê TÎKKO seba partîya TKP/MLyî şer kerd û bî bêmerg. Heme cuya xo seba ke derbe bido dişmenî ro feda kerd. Hetêk ra wezîfeyê îdeolojîk, polîtîk û rêxistinî ard ca, hetêk ra zî wezîfeyê şerê gerîlayî bi hawayo serkewte meşna.”Bi seyan şervanan resna
Komîteye dewamê îzehetî de derheqê Fermandar Bakirciyanî de malumatê winasî daye: “Fermandar Bakirciyanî tarîx û mekananê cîya-cîyayan de bi seyan şerwanan resna. Sey nimûne; serranê 1988 û 90 de Filistîn de, 91-92 de Karabagê Ermenistanî de, 2014 de Başûrê Kurdistanî de û 2015 de zî Rojawan de seba ke wezîfeyê xo yê şoriş û azadî bikerî, xeylê şerwan û fermandaranê TÎKKO resna. Heto bîn ra bi seyan şerwananê kurd, tirk, ermenî, ereb, filistinî, yewnanî û sewbîna perwerde kerd û erşawit şer. Rojawan de seba ke pratîk û malumatê şerwananê tirkîyayijan berz bikero, tewr vernî yê şerî de cayê xo girewt. Cok ra Fermandar Orhan bî embazê heme şerwanan. Wextê xoverdayîşê Silukî de bi derbê ke dayî çeteyanê DAIŞî ro heskerkerdişê heme şerwananê Taburê Azadî yê Enternasyonalî qezenç kerd. Vera faşîzm, emperyalîzm û kehenperestî de şer kerd û zaf cayanê welatî de wezîfe û berpirsîyarîyê girdî girewt milê xo ser. Wexto ke Parîs de faelîyetê şorişgerî meşnayêne, pawitoxîya hunermend Yilmaz Guneyî zî kerdêne.”Qet tepîya nêvindet
Komîte îzehetê xo de bale ante xusûsîyetê Fermandar Orhanî ser û îzehet wina dewam kerd: “Fermandar Orhan Rojawan û Rojhelato Mîyanên de temsîlkarêko baş yê rêxistina ma bî. Hem vera dişmenî de û hem zî karê rêxistinî de rolêko nimûne kay kerd. Fermandar Orhan bî sembolê felsefeya ‘Loqmeyêk û xirqayêkî’. Fermandar Orhanî cuyayîşê xo de bi qehremanî, embaztî, fedakarî û mutevazîtîya xo ame şinasnayîş. Seba Şorişê Şarî yê Demokratîkî bi dayîşê bedelî ra û girewtişê rîskî ra qet tepîya nêvindet. Bi cuya xo ya şorişger, fermandarî û mîlîtanîya xo her kesî rê bî nimûne. Wexto musnayêne o bi xo zî musayêne, wexto ke dayêne şerkerdiş o bi xo zî şer kerdêne, wextê şerî de fermandar, wextê fermandarî de zî sey şerwanêkî hereket kerdêne û fermandarîya şorişgerî nîşanê her kesî da.”Orhanî vera xo da Koyanê DêrsimîÎzehet de wina ameyo vatiş: “Fermandar Orhanî demanê peyênan de seba çareserîya tayê problemanê partîye fedakarîyêka girde nîşan da û vera xo da Koyanê Dêrsimî. Seba ke embazanê xo yê Dêrsimî reyde bêro têhet, hewldayîşêko gird da. Verîya şehadetê xo de reyna agêra warê Rojawanî û seba ke enerjîya ke tîya de vejîyabî orte, kanalîzeyê welatî bikero û yewîya kurd, ereb, tirkmen, suryanî û ermenîyan gird bikero, agêra wezîfeyê xo ser. Wexto ke Fermandar Orhan wezîfeyê xo ca ardêne, şehîd kewt, hetê ci de 3 şerwanê îranij, kanadayij û sardînyayij zî birîndar bîyî. O heme cuya xo de goreyê îdeolojî û fikrê Kaypakkayayî esas girewt û girêdayeyê ci mend. Seba ke stratejîyê şerê şarî bikewo dewre, bi şewe û roje kede da.”
Komîteye peynîya îzehetê xo de wina vato: “Fermandar Orhanî dejanê şarê ermenî hîs kerd û vejîya zîrveyê koyanê Araratî. Nameyê xo xeta fedaîtîya şerwanan ra girewt. Fermandar Orhan zîrveyê Araratî ra ver bi Filistîn, Dêrsim, Ermenistan û Rojawanî herikîyayo. Ma sey şerwanê ke bin fermandarîya ci de yî soz danî ke girêdayeyê vîrardiş û fikrê ci bimanî û rayîrê ci de bimeşyî. Ma soz danî ke vîrardiş û xeyalanê heme şerwanê ke girêdayeyê Raybero Komunîst Îbrahîm Kaypakkayayî bîyarî ca.”
ANF/BRUKSEL