Nê fermandarê derbekar ke ameybî binçimgirewtiş bi talîmatê hukimatê AKP û Erdoganî şaristanê Kurdistanî ra hêriş kerdbî û şaristanan talan û wêran kerdî. Nê fermandaran hetê çapemenîya AKPî zey qehraman ameyî nîşandayîş. Fermandarê derbekar ke ameyî girewtiş ser o vîra merdim eceba nê fermandaran Kurdistan de talan û wêrankerdişê şaristanê Kurdistanî û kiştişê ciwan, cenî, doman û extîyarê kurdan ra bêrî dariznayîş? Babete ser o endamê Komeleya Huqiqnasê Mezopotamyayî (MHD) Cemal Demîr qise kerd.
Her kes şahîd bî
Endamê MHDî Cemal Demîr vat ke verê heme çimê dinya de nê fermandarê derbekar şaristanê Kurdistanî zey Nisêbîn, Cizîr, Silopî, Sûr û Gever talan kerdî û sivîlan qetil kerdî û wina vat: “Sûcî ke nê fermandaran Kurdistan de kerdî, sûcê derbe ra hîna giran o. Ma meraq kenî eceba nê fermandaran Kurdistan de talan û wêrankerdişê şaristanê Kurdistanî û kiştişê ciwan, cenî, doman û extîyarê kurdan ra bêrî dariznayîş?”
Dozê Balyozî
Endamê MHDî Demîr aşkera kerd ke babetêka bal ancena demê dariznayîşê nê fermandaran de Kurdistan de sûcê qirkerdiş û rijnayîşê şaristanan zî daxîl bêrî kerdiş û wina domna: “Ma dozê Ergenekon û Balyozî de rewş dî nê fermandaran qet sûcê serrê 90’î Kurdistan de kerdî ra nêameyî dariznayîş. Nê fermandaran do sûcê teşebbusê derbe ra bêrî dariznayîş la esil sûcê nê fermandaran sûcê şerî yo, çimkî nê fermandaran Kurdistan talan kerdî. Ganîya ke şaristanê Kurdistan de sûcê qirkerdiş û rijnayîşî ra nê fermandaran bêrî dariznayîş, benda ma ser ci yo.”
Seba kurdan OHAL her tim estbî
Kesî ke şahîdîya OHALê 1980’î kerdî, hayr antî OHAL de çi bêrî cuyayîş ser o. Elewîyê Dêrsimî ra Duzgun Taş (57) demê OHALê 1980’î çi cuyayo wina ard ziwan: “Demê OHALê 1980’î de qeraqaol de min marûzê îşkenceyê ceyran, cop, askiya fîlîstînî û heqeret mendî. Qeraqol de bêmîyan vengê kesan ameynî, çimkî ona îşkenceyêko gird kerdînî ke merdim nêeşkîyaynî bivindero. Merdim nêeşkîyaynî qise bikero, çimkî her roj 12 saet ma ra îşkence kerdînî. No ser kurdan OHALî ra xerib nîyî û weş zanenî çîyo.”
DÎHA/WAN