Dûştê hêrîşanê hewayî yê dewleta Tirk ke 25ê Nîsane de hemverê Şengal û Rojawa virazîyay nêrazîbîyayîşê Kurdan ramenê. Hêrîş ra dima Kurdistanijê Rojawa, Bakûr, Başûr û yê teberê welatî bi nûmayîş û îzahatan hêrîn lanet kerdî, hêrs û nêrazîbîyayîşê hera damûsnay. Cinîyê Amedij zî vera hêrişan lanet vornay.
Cinîyan ra Şukrîye Çalpan hêrîş şermizar kerd û bi persa "Çi karê Tirkîye Şengal û Rojawa de esto” hêrsê xo damûsna. Çalpan vist vîrî ke Rojawa û Şengal ê kurdan o û va, “Eke Tirkîye zî nayî qebûl bikero, do rind bibo. Tirkîye bi polîtîkayanê şerî nêşkena şiro cayekê zî.”
‘Çîyo ke DAIŞ nîme de terna Erdogan wazeno temam bikero’
Cinîya bi nameyê Ayten Çelîk zî dîyar kerd ke ganî ti kurdeke nê hêrîşanê Tirkîye qebûl nêkero û dewam kerd: "Erdoganî çîyeke nêmend ke ard serê kurdan.No bes ê ci nêkerd, na qorî zî hêrişê şarê Şengal û Rojawa ke bi desan şehîdan hardê xo pawitî û xelesnay, keno. No barbarîzm o. DAIŞ bes nêbi, nika zî Tirkîye hêrîş kerd. Nê hêrîşê înan ê DAIŞ'warî nênê qebûlkerden. Wa Tirkîye desince fek nê hêrîşan da verado. Zewbîn do vinî bikero.”
‘Ganî dinya reaksîyon damûsno’
Zekîye Yilmaz ke hayr ant dişmenîya Tirkîye ya hemverê Kurdan ser û va: “Tirkîye bi nê hêrîşanê xo fina da bîn damûsna ke DAIŞ’î het de ca gêna. Tirkîye her ca de dişmentîya Kurdan kena. Seba çi şarê Şengal û Rojawa seba Erdoganî taloke yê? Kotî de Kurdî estê, Tirkîye hêrîşê ci kena. Ma dê hardê xo ra fek vera nêdê. Wa hêrîşan ra fek veradê.”
Yilmaz waşt ke verikîn cinîyê Kurd û her kes dûştê nê hêrîşan de vindero û nêrazîbîyayîş damûsno.
Dewleta Tirk xo xapînena
Cinîyan ra Belgîn Dîkken ke hêrîşan rê reaksîyon damûsna zî wina va: “Eke dewleta Tirkîye fikir kena ke do bi kiştiş û hêrîşan şarê Kurd biqedîno, xo xapînena. Kurdî bi kiştişî nêqedîyenê. Xo ra şarê Rojawa û Şengal bi têkoşîna xo damûsnay ke ê bi merdişî nêqedînê. Ma hetê şaranê Şengal û Rojawa yê. Senî ke şaranê dinya bi paştî day têkoşîna Rojawa, ganî hêrîşanê Tirkîye zî qebûl nêkerê.
Wa Barzanî şerm bikero
Besna Efe zî hêrîşanê Tirkîye zey fermanêko newe hesibna û diyar kerd ke ganî Tirkîye ca de hêrîşan ra fek verado. Efe, vist vîrî ke hemverê şarê êzidî fermano peynî bi destê Erdoganî virazîyeno. Besna Efe rîwalo ke hemverê hêrîşan de bêveng mendo Serokê PDK Mesûd Barzanî rê zî nêrazîbîyayîş damûsna û vetananê xo wina qedêna: “Ganî Barzanî bêveng nêmano û reaksîyon damûsno. Bi bêvengîya xo hêrîşan qebûl keno. Ganî baw û kalikanê xo ra şerm bikero, bêvengîya ci şermeke gird a. Wa xîyanetê birayanê xo nêkero, ba bibo yewe.”
DÎHABER/AMED