Ferqê 1994 û 2012

Teyna hukumatê serra 2012 tenena jede zurkeno, pê qoman xapneno. Her mesela sero qesey keno, meselan zî halnêkeno.
Tabî waxt aynî waxt niyo. Kurdî aynî kurdî niyê. 1994 waxtoke mebusê kurdî meclîse ra bi zor ameyî guretene û erjiyayî zîndanan, reaksiyonê kurdan honde qewetin nêbî.
Eke vuriyayîs vame, ewro na vuriya: Kurdî endî verva zulmê dewleta tirkî bêters û xirt erzenê xover, her mereve de danê pêro. Verva faşîzmê AKaPe jê 1994 bêveng nêmanenê.
Hama zovîna her çî jê 1994 yo.
Verva kurdan herbo qilêrin devam keno.
Meyîtê însanê kurdî serestîsanê quwetanê hukumat û dewleta tirkî rê benê hedef.
Teyna 3 serranê peyenan de faşîzmê AKaPe 10hezar ra jede siyasetvanê kurdî estî hepisxanan.
1994 de qe ke nê domonê kurdî honde hedefê serestîsanê dewleta terorîste nêbiyenê. Ewro domonê kurdî hem erjînê zîndanan, hem zî zînandanan de cirê tacîz û tecawiz beno.  
Çapemeniya kurdan serbest niya, zonanê ma de perverde çîno, hukumat û dewleta faşîste naye zî nêwazenê.
Bi mîlyonan însanê kurdî biyê macur, hona nêşîkînê şerê welatê xo. Koçberiye hona zî ramena.
Recep Tayyîp Erdogan bi xo vano: Mesela kurdî çîna, mesela kurdan esta. Yanî înkar zî rameno.
En peyecoy onca ey bi xo vat: Çiyo ke ma de esto kurdan çîno, çik o?
Çiyêke mi cor mordî zuranê ey kenê eskera. Yê tirkan her çiyê xo esto. Macur niyê, zonê tirkî de perverde esto. Bi mîlyonan tirkî macur nêbiyê û bi 10hezaran siyasetvanê tirkî rîwalê kamiya xora hepisxanan de niyê.
Îşte naye ra wo ke seweta kurdan mavênê serra 1994 û 2012 de ferq çîno. Nameyî vuriye.
Tansu Çîller, Bulent Ecevît, Mesut Yilmaz û Devlet Bahçelî şî, Recep Tayyîp Erdogan ame. Dogan Gureş, Karadayi, Kivrikoglu, Ozkok, Buyukanit, Başbug û Koşaner şî, kîmyasal Necdet ame.
Aynî polîtîka ramena, aynî zulm verva kurdan devam keno.
Çi vuriyake!
*****
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.