Festîvala 17. ya Xoza û Kulturî ya Mûnzûrî ke do wazîyeno mavêna 27-30’ê Temmuze de bi slogana “Festîval yê şarî ya, do yê şarî bo, OHAL û awbendan rê nê” virazîyo, bi fermanê walitîyê sûk amê qedexekerdiş. 

Festîvala Xoza û Kulturî ya Mûnzûrî serra 2000î ra na het virazîyena.  Bernameyê festîvala 17. kî verîya çend rojan bi kombîyayîşeke çapemenî ame aşkere kerdiş. Û ame pawitiş ke zerre û teberê welatî ra xeylê kesî tewrê festîval bibê. Çiheyf ke festîval raştê barîqatê OHALî amê. Walitîyê sûk komîteyê amadekarî rê teblîxateke ruşna û dîyar kerd ke çarçoveyê qanûna kombîyayîş û nûmayîşan ya bi hûmara 2911 de wextê OHALî de her hawayê nûmayîşan qedexe yo. 

Festîvala Mûnzûrî vera hêrîşanê dewlet yê zey tolkerdişê dewan, viraştişê awbendan, vera opersyonanê sîyasî û lejkerî bî qîrayîşê şarî. Vera polîtîkayanê teslîm girewtiş, bêmordemîvistiş û talanî de têkoşînê estbîyayîşê jû sûkî de cayê xo girot. Na festîvale bî nameyê hewldayîşê wayîrvejyayîşê tarîx, kultur û xoza yê şarî. 


Kamîya elewitî û kurdatî hedef de ya

Seba vernîgirewtişê xoverdayîşê Dersim û temamkerdişê polîtîkayanê asîmîlasyonî, qeyûmo ke tayînê şaredarîya DBP yê Dersim bi, hewl dano festîval goreyê motîfanê tirkperestîye virazo û mîyanokê ci pûç bikero. Dişmenîya dewleta tirk ya vera Dersim ke serranê 1930î ra tepya destpa kerd hona ramena. Dersim rîwalê kamîya xo ya elewitî û kurdatî ra pîya, rîwalê vindertişê xo yê sereberz ke ti wext çok nêda ro, her tim hedefê dewlet de bi. 


Qirkerdişê kulturî yo

Wextanê peynî de zî hêrîşê dewlet bi destê qeyûmî ramenê. Xisûsî xebatê kulturî û yê ziwanî hedef de yî. Qeyûmê xespkar ke tayînê sûk bî, tabelaya şaredarî ya bi sernuşteyê “Dersim” aliqniyayî bî ra pîya, xeylê sazgeh, komel, esnaf û kuçeyan açarnay tirkî. 

AKP hewl dana ke pêrokîn rêçanê Dersim têkbibero û hurendîya ci de ‘tirkperestîye’ û rejîmêke bi rengî sunîye înşa bikero. Seba na proje jû hetî ra operasyonê leşkerî yenê ramiten, heto bîn ra seba qirkerdişê sîyasî û kulturî her çî kena. Qedexekerdişê Festîvala Xoza û Kulturî ya Mûnzûrî zî nê hêrîşan ra jû ya.  


 DERSIM