Festîvale reyde wayîrê Dêrsimî vejîyenî

Festîvala Kultur û Tebîetî ya Muzirî ya 19. emser do mabênê 25 û 28ê Temmuze de bêro viraştene. Amadekarîyê seba festîvale ver bi qedîyayîşî de yî. Komîteya Amadekare ya Festîvale seba festîvale muracatê Walîtîya Dêrsimî kerd.

Par Walîtîye bi mehneya ‘Propagandaya rêxistine yena kerdene’ festîvale qedexe kerdbî û emser yeno meraqkerdene tirêm do seba muracato ke ameyo kerdene se vajo. Heman wextî de do temaya festîvala emserî texrîbatê vera tarîx û kulturî de bê û do siloganê ci zî ‘Dêrsim rê, bawerî, ziwan û kulturê ci rê wayîr vejîye. Biciwîye û bide ciwînayene’ bo.

25ê Temmuze de do sere de Rasteyê Seyîd Rizayî de eşkerayîyêk bêro dayene û dimayê tafînayîşê çirayan do festîvale dest pê bikero. Do festîvale de çalakî û konserê tewir bi tewirî bêrê viraştene û do heta 28ê Temmuze dewam bikero.

Endamê Komîteya Amadekare ya Festîvala Kultur û Tebîetî ya Dêrsimî Alî Haydar Benî babete ser o va ‘reya ewilêne festîvale serra 1999 de ameyo waştene ke vera veşnayîş û vengkerdişê dewan de bêro viraştene, la a game ameya qedexekerdene’ û wina domna: “Naye ra festîvale reya ewilêne serra 2000î de ameya viraştene û festîvale vera vengkerdişê dewan, viraştişê barajan, santralanê hîdroelektrîkan û madenan de tewirêko muhîm ramoto. Hendî festîvale de ziwan, bawerî û kulturê cîyayî zî estê. Emser temaya sereke ya festîvale kultur, ziwan, bawerî û nameyê‚ Dêrsimî yo. Nameyê Dêrsimî qebul nêkenê. Ma do festîvala emserî de reyna nameyê Dêrsimî rê wayîr vejîyê.”

Benî tewr peynî de vat ke eleqeyêko zêde seba festîvale esto û ê omid kenê ke tewrbîyayîşêko pîl bibo û veng da her kesî ke tewrê festîvale bibê û nameyê Dêrsimî rê wayîr vejîyê.