Rewşa OHALî de 3.500 endamê KESKî gureyê xo ra ameyî îhraçkerdiş. Mîyanê kesê ke mexdur bîyî de hîkayeyê cîya cîya zî estî.
Heme îqtîdarê ke heta nika ameyî gure ser, yew bi yewe komelî mexdur kerdî. Dursun Dogan û Yalçin Duzgun reya dîyin a ke yenî mexdurkerdiş. Reya yewine serra 2013 de seba ke heqê weşî û wendişê bêpere waştî, 11 aşmî hepisxane de mendî. Nika zî nasnameyê muxalîfî ver doza FETO ra gureyê xo ra ameyî îxraçkerdiş.Babete ser o Serekê Şûbeya Hûmara 1î ya Egîtîm Senî yê Stenbolî ke girêdayeyê KESKî ya Dursun Dogan û Yalçin Duzguno ke beşa werzîşî de mamostetî kerdênê û dima ra îxraç bîyî, qisey kerdî..
Faşîzmî ver de mesûlîyeta xo bîyarîme ca
Dogano ke 25 serrî Serekîya Daîreya Bacî de xebetîyabî, qisey kerd û wina va: “Teqawitîya mi rê 61 aşmî mendbî. Cinîya mi Fîliz Dogane zî Defterdarîya Gungorenî ra ameye îxraçkerdiş. Serra 2013 de ma FETO ra tepişîyayî, nika zî AKP ma îxraç keno. Ma heme prosesan de mexdur bîyî. AKPyî asayîş û hukm girewt destê xo. Nika wazeno ke heme cayan bigiro bin kontrolê xo. AKP hetgiranê xo dekeno herinda ma. AKP seba menfîetê xo rewşa OHALî derg keno. Tarîxî mesûlîyet dayo milê ma ser. Ganî heme roşnvîr, demokrat û kerdkar faşîzm ver de berpirsîyarîya xo bîyarî ca û têkoşîn bidî.”
Heqê wendekaran
Duzgunî va ‘serra 2013 de seba ke ma wendiş û weşîya bêpere waşt, cezayê hepisxaneyî dîya ma’ û qiseykerdişê xo wina qedêna: “Nika zî ma gureyê xo ra ameyî îxraçkerdiş. Kedkarî bi vêşanî yenî terbîyekerdiş. No proses de tena ma mexdur nêbîyî. Wendekarî zî heqê xo yê wendîşî ra ameyî mehrumkerdiş. Kesê ke têkoşîn danê baş zanê ke ancax bi girdbîyayîşê têkoşînî hêrişî kêmî benî.”
ZEYNEP KURAY / ANF / STENBOL