Parlementerê HDP û serokwekîlê koma HDP Îdrîs Balûken ke derheqê ravêrşîyayîşanê sîyasî û rojdema pêroyî de qisey kerd. Balûken ke derheqê êrişanê dûştê DBP, HDP, ablûqeya Licê û êrişanê dûştê çapemenî de qisey kerd hayr ant tayînkerdişê kayyûman ser. Balûkenî aşkere kerd ke babeda kayyûmî fînalê hewldayenê derbe yo û vist vîrî ke Erdogan dano linga xo ro.
Badê qetlîamanê sivîl, rijnayişê sûkan, wedarnayişê destnêdayişê parlementarê HDP, operasyonanê eskerî hikûmeta AKP nika zî babeda hurendîya şaredarîyanê DBP de tayînkerdişê kayyûman ard rojdem. Na waşten zey leteyê plana tesfîyekerdişê sîyaseta kurd yena hesibnayene. HDP û DBP bi desan reynî aşkere kerdî ke iyê dê dûştê enê plan û hewldayenan de teslîm nêbê.Serokwekîlê HDP Îdrîs Balûkenî zî derheqê babed de qisey kerd û hayr ant plananê AKP ser.
‘O ke poşt dano teror AKP yo’
Balûken’î hayr ant wedarnayişê heqê destnêdayişê parlementeranê HDP ser û aşkere kerd ke verra wekîlanê HDP operasyon û kampanya lînç amê destpa kerdene. Îdrîs Balûkenî da zonayene ke AKP îdia kena ke ‘HDP poşt dana terorî’ û wina dewam kerd: “La quwetê mavên neteweyî her firsetî de anê rojdem ke AKP Rojhelata Mîyanî de poşt dana komanê terorî.”
Serokwekîlê koma HDP hayr ant babeda tayînkerdişê kayyûm û êrişanê dûştê şaredarîyanê DBP ser zî û nê hewldayenan zey fînalê derbeya Erdoganî hesibna. Balûken’î vist vîrî ke Erdoganî Serokwezîr wezîfe ra girewt, parlemento kerd têtewr û va, enê pêrokîn nimûneyî îşaretê derbe kenê. Balûken’î ard zon ke Erdogan o ke enê pêrokîn çîyan keno nika zî wazeno îradeyê heremî yê şarî tesfîye bikero wina va: “Erdogan o ke çiwext fekê xo akeno (keno a) behsê ‘sondiq’ keno. La jew keso ke sondiq wina bimbarek vîneno îradeyê şarê kurd çinî hesibneno. No zî netîceyê nakokîya ke Erdogan ciwîyeno damûsneno.”
‘Şar kayyûman qebûl nêkeno’
Parlementerê HDP û serokwekîlê koma HDP Îdrîs Balûkenî hayr ant vatişê Erdoganî yê ‘Weçîntayenan tayînkerdişan ra nêdame pelixnayene’ ser.
Balûkenî aşkere kerd ke eynî Erdogan ewro zî hewl dano ke hurendîya hemşaredarê ke bi reyanê se ra 90 yê şarî ameyê weçînayen memûranê tayînkerdî bîyaro û vatişê xo wina domna: “2 serr û nîm demê çarekerden de Erdogan û sermîyanê hikûmetî hertim ardî zon ke ganî îhtirazê vera Şerta Xoserî yê Xorayverîyanê Heremî yê Awrûpa bîrê wedarnayene. Hereman rê dewrkerdişê raye yê (hikmê) navendî Ocalanî rê zî resnayî. Kesê ke nê vatişan ewro day jû kiştî bi kayyûman îradeyê şarî çinî hesibnenê. La şarê ma nayî hezm nêkeno û do qebûl zî nêkero. Dewre vistişê na planî do kaosî bi xo ra bîyaro.”
‘Lîce reyna xover dano’
Serokwekîlê koma HDP Balûkenî êrişanê dûştê sûk û qezayanê Kurdistan vist vîrî û hayr ant operasyonê dûştê Licê ser: “Operasyonê Licê leteyekê konseptê herb yê AKP yê. Bi (pê) êrişanê verra Licê mesajê ‘Mi sûkî kerdî veng. Qetlîam viraşt, eynî çî dewan de zî kena’ danê.” Balûken’î da zonayene ke eynî çî serranê ’90î de zî kerdî û wina va: “Ê serran de 5 hezar dewî veşnay û rijnay. Êrişê verra Licê zî na şiklî yê. Licê do zey gelenega xo ya verîn wayîrê rûmeta xo û tekoşîna xo bivejyo û polîtîkayanê qilêrîn yê dewlet tol bivejno.”
‘Exmaqî yo’
Îdrîs Balûkenî êriş û terora dewlet ya dûştê çapemenîya azad vist vîrî û hayr ant tepiştişê Prof. Dr. Şebnem Korur Fîncanci, rojnameger Erol Onderoglû û nuştox Ahmet Nesînî ser. Balûkenî aşkere kerd ke nê êrişî tersê Erdoganî damûsnenê û qiseyê xo wina dewam kerd: “Ma dî ke kesê ke qetlîamanê Cizîr û Sûr kerdî rapor seyî (çitûr) tehdît kerdî. Hemverê ma de jew Erdogan o ke Ozgur Gundem, DÎHA, JINHA û quwetê raştîyan ra terseno esto.Rîwalo ke merdim nê çîyan bikero ganî merdim exmaq bo. No pirodayişê linga bi xo yo. AKP û Seray torzîng da linga xo ro.”
Balûken’î aşkere kerd ke her roj peynîya Erdoganî hona jêde nezdî bena û hayr ant muhîmîya berzkerdişê tekoşînî ser. Balûkenî da zonayene ke Ozgur Gundem çi qe raştîyan binuso hendayî Erdogan do şaştîyan bikero.
DÎHA/AMED