4ê Gulana 1938î de Dêrsim de qirkerdişêko pîl amebi kerdene û bi sehezaran merdimî ameybî kiştene û hendêna zî ameybî surgunkerdene. Her serre 4ê Gulane de no qirkerdiş hetê xeylê hetan ra yeno şermizarkerdene û kesê ke ewja de merdî, yenî yadkerdene.
Emser zî sere de Dêrsim de û Îzmîr, Antalya û sewbîna xeylê cayan de vîrardişî ameyî viraştene. Dêrsim de Rêxistinê Komelanê Sîvîlan û partîyê sîyasîyî ameyî têhet, seba kesê ke ameyî kiştene rêz girewtî. Çalakwanan saete 19.38 de Rasteyê Seyîd Rizayî de findî tafînayî.
Çalakîye de metnêko ortax ame wendene. Metin hetê Endamê Federasyonê Komeleyanê Dêrsimî Zulfu Uçarî ra ame wendene. Uçarî wina va: “4ê Gulana 1937î de bi qerarê Heyetê Wezîranî Dêrsim de prosesê qetlîyamî dîya destpêkerdene. Qetlîyam ra dima bi hezaran merdimî kişîyayî û bi deshezaran merdimî zî surgun bîyî.”
Uçarî waştişanê xo bi no qeyde rêz kerdî: “Wa polîtîkayê asîmîlasyon û înkarî biqedyî. Wa 4ê Gulane roja Qirkerdişê Dêrsimî bêro qebulkerdene. Wa arşîvî bêrî akerdene û dewlete qetlîyam reyde têrî bimano. Wa nameyê Dêrsimî tepîya bidîyo û wa şarê Dêrsimî ra ozir bêro waştene. Reyna wa lîsteya domanê ke vînîbîyayeyî û cayê mezelê Seyîd Riza û embazanê ci bêro eşkerakerdene. Wa projeyê barajan betal bibî.”
Peynîya çalakîye de findî tafînîyayî û loqme ame vilakerdene.
DÊRSIM