BARIŞ DONMEZ / MA/WAN
Bajarê Kumî yê Îranî de vîrusê Koronayî ser o zaf hûmarî kesî cuya xo dayî, no ser zî Wan de maskeyê medîkalî ra elaqa zêdîya. Kuçe û papolan de kesî ke maske panenê humara înan bî zaf, vera na elaqa fîyatê maskeyî zî bî vaye. Fîyatê maskeyi 2 TL ra vîyart bî 5 TL. Babete ser o Serekê Odeya Colemêrg-Bedlîs-Wanî Fîkret Baransel vat ke maske muhîm nîyo, pankî û hîjyen muhîm ê. Serekê Odeya Colemêrg-Bedlîs-Wanî Baransel aşkera kerd ke na nêweşî de tewro teluke ginayiş o, çi heyfo ke kulturê Kurdan de ginayiş zî muhîm o, çimkî nêzdê yewbînan cuyenê, no ser zî ganî şarê mintiaqaye do hembezkerdiş, destdayiş û lewekerdişî ra fek verabidê.
Şar qerqizyeno
Baransel wina dewam kerd: “Maske panayiş vergirewtişêko muhîm o. Çi heyfo fîyatê maskeyî zêdîyayî, no zî problem o. Nika şar qerqîzyeno, ganî ma pankîya xo ra diqet bikê. Ganî vatişê xebatkarê neweşî verçiman bêrî girewtiş. Zanayiş muhîm o, vatişê bi werdişê kele paçayî çik nêbeno, vatişêko şaş o.”