Serranê 90î de, bi hezaran welatijî bi wesayîtanê ‘Torosê Spî’ amey remnayen, vinîkerdin û kiştin. La dewrê AKP de, hurendiya ‘Torosê Spî’ wesayîtanê ‘Ford Ranger’an giroto. Qûwetê dewlet nika bi Ranger’an rojnamegeran, siyasetmedaran û welatijan gênê binçim, remnenê û tehdît kenê. Dersim de kî Ford Ranger’ê AKP dewriye geyrenê, werteyê kuçeyan de, raya welatijan birnenê û tehdît kenê.
Jû roj ti kuçe de mirena…
Vilakerdoxa Rojnameyê Azadiya Welat yê Dersim Azîme Bozkûrt, zey her rojî vizêr nê perey kî, seatanê sodir de aboneyan rê rojname kerd vila. Bozkûrt bado ke, rojname da aboneyanê Otogar, hetê kuçeyê Merkezê Kiltûr yê Gencan ray şî. Polîsanê bi wesayîta Ford Ranger, no kuçe de verniya Bozkûrt girot û rojnameyanê destê ci qontrol kerd.
Azîme Bozkûrt rîwalê ke cuzdanê nifûsî ser ci de çinêbi, qerta xo ya sazî da. Ser nay polîsan bi vatenê ‘ti çima nasnameyê xo, nêgena ser xo. Jû roj eke ti werteyê kuçe de bimira, eke qezayeke bîro sereyê to, malbata to do çitur to bisilasno’ tehdît kerd.
DÎHA/DERSIM