Bi nameyê Halîme Alparslane de cinîya ke qezaya Germencîkî ya Aydinî de, Taxa Ortaklarî de manena, seba ke Newroza 2008î de vernîya beyraqa rengê keske, sûre û zerî de fotografêk anto û medyaya sosyale de pare kerdo, ameybî tepiştene.
Alparslane badê ke 2 rojî tepişte mendebî, serbest veradîyaybî, labelê aye rê tehqîqat abibi. Kanûna 2018î de 2 serrî cezaya zîndanî dîyaybî aye. Labelê cezaya aye seba ke aye diganî bîye, ameybî taloqkerdene. Alparslane badê ke domanê xo arde dinya ra 8 aşmî ra pey bi kênaya xo ya 8 aşmî, erzîyaye Zîndanê Tîpa Tyî yê Şakranî.
Babete ser o dayîka Alparslane Zehra Kizilaye qisey kerde û wina va: “2 torinê mi bêdayîke mendî û aye bîne zî zîndan de bena pîl. Kamcîn wijdan nêyî qebul keno? Kênaya mi 11 serrî ra pey ameye cezakerdene. Psîkolojîyê torinanê mi xirabe bîyo. Torinêka mi hertim bermena û wazena ke şêra dayîka xo. Wa torinê mi bêdayîke pîl nêbî.”
‘To terorîstî rê cilî ardî?’
Kizilaye qiseykerdişê xo de qala zextanê zîndanî zî kerde û wina va: “Torina mi nêşêna lazimîyanê xo pê bîyara. Torina mi de ne gonîye menda û ne zî reng mendo. Hertim nêweş kewena. Werdê zîndanî nêwirîyeno. Wexto ke mi cilî berdî zîndan, gardîyanan mi ra va ‘To terorîstî rê cilî ardî?’ Ez wazena ke wa kênaya mi biagêro keyeyê xo.”
MA/AYDIN