2016 zaf zor vîyart. Çîyî ke ameyî qewimîyayîş wina rehet vîrê merdiman ra nêşinî. Aye ra gere her çî ra ver merdim muhasebeyê 2016î baş bikero û goreyê aye zî 2017î ra çîyanê neweyan bipawo.
Mi waştêne no qunciko ke serra newîye de ma rê ame cêrakerdiş de nuşteyê xo yo ewilin de behsê aştî û azadî bikerî. La no welat de rakewtişê nêm saetan ra dima çi qewimîyeno merdim nêzano, no zî waştiş û xeyelanê merdiman ra tesîrêko pîl keno.
****
Sey her serre emser zî semedê serra newîye beyanatî ameyî dayîş û bê îqtîdarî gelek hetan ra semedê aştî û demokrasî mesajî ameyî dayîş. La ê kesî ke muhasebeyê 2016î baş kerdbî xo ra zanayêne ke do 2017î de çi biqewimîyo, tabî nê kesî tay îxtîmalan ser nê çîyan zanayêne yan zî fikiryayêne. Çunkî sere de goreyê kurdan û pêroyî de zî goreyê gelek hetî ke 2016î binê tedayan de cuyayî, cîyayîya 2017î, 2016î ra çin a.
****
Ê zanî ke parlementer, şaredar, îdareker û gelek merdimê înan peyê berî de kewtî serra newîye, ê zanî ke gelek hetê welatî de laj û kênayê înan binê bombardumanî de kewtî serra newîye. Aye ra 2017 semedê înan çîyêk îfade nêkeno. Welato ke tede her roje yewbînan ra dûrîbîyayîşê merdiman zêde bo, helbet çîyêko baş nêno hişê merdiman.
Herinda çîyanê başan de aqilê merdiman de tena dûrîvistişê cîyayan esto. O zî bi destê hikûmeto ke demêk semedê fikranê xo hetê sîstemî ra amebî dûrîvistişî ra yeno kerdiş.
Çi qezenç keno? Çira keno? Esasê xo de her çî orte de yo la hema zî ê kesê ke boçê înan tepişenî, zêde yî. Ê nêvanî ke no hikûmet welat kerdo adir û adir ma veşneno. Tena sey temaşeger cayêk de ronişte yî û wexto ke boç wazeno ê, ey bitepişî cayê xo ra leqenê bê aye zî çîyêk nêkenî.
****
Bi nê çîyan ma kewtî serra newîye. Şewa ke merdimî serra newîye pîroz kerdêne yan zî keyeyê xo de tena sey temaşeger roniştebî qet nêardêne xo vîr ke fragmanê 2017î do temaşe bikerî. Tayî xo rê hêvîyan dima bî tayî zî pawitêne ke çîyê başî bêrî înan ver.
La saete 00:00 vîyart û wexto ke pîrozbayî dewam kerdêne, pêroyîyê ajansan de xeberêka lezgîne amey parekerdiş. Stenbol de hêrişo çekin ameyo meydan û gelek kesî merdî. Yanî roja yewine ya 2017î ke milete tira hizur pawitêne bî cehenem. Mîyanê o cehenem de 39 kesî merdî û gelek kesî birîndar bîyî. Sey her wext îqtîdarî va, ‘Do nêeşkî milê ma çewt bikerî’ û qerarê qedexeyê weşanî dîya.
****
Fragmanêko winasî şewa serrneweyî de bi kerdenanê dewlete û DAIŞî ame nîşandayîş û o zî bes nêkerd, DAIŞ semedê hêrişanê neweyan veng da milîtanê xo yê ke hucreyanê Tirkîya de yî.
No fragmano lêşin de kurdî çin ê la dewlete zî baş zana ke rayê nê cehenemî ra vejîyayîşî Kurdistanî ra vêreno.