7ê teşrîna peyêna 2016î de Dêrsim de teyarayê dewlete bombe varnaybî û netîceyê bombevarnayîşî de 15 gerîlayî şehîd kewtbî. Nê gerîlayan ra yewe zî gerîla Recep Karataş (Roj Gabar) ke şehadetê xo ra 4 rojî dima amebî definkerdiş o.
Recep Karataş qezaya Tekmanî ya Erzîromî ra girêdaye dewa Kayabogazî de ameyo dinya û heta 5 serreyîya xo tîya de maneno. Dima ra keyeyê ci problemanê ekonomîkan ver koçê bajarê Îzmîrî keno. Recep hîna 15 serreyîya xo de dest bi xebetîyayîşî keno û bi welatpewerîya xo yeno şinasnayîş. Recep wexto ke nîşanê xo pa keno, embaza xo ra vano ‘ganî ez vera zulmî de têkoşîn bida’ û vera xo dano koyanê Kurdistanî û beşdarê gerîla beno.
Babete ser o birayê ci Burhanettîn Karataşî derheqê birayê xo de qisey kerd. Birayê ci va ‘birayê mi hem bira û hem zî lajê mi bî’ û wina dewam kerd: “Recep destê mi de pîl bî. Lazimîya kamî bi hetkarîye bibîyêne, Recep hetkarîya ci kerdêne. Fedakar bî. Kam problem bicuyayêne, Recep hetê ci de bî. Birayê mi sey wisarî rengin bî. O qehremano ke vera zulmî de vindetêne bî.”
Wextê ci amebî û şî
Birayê ci wina domna: “Recepî Serewedarnayîşê Kobanê dî û nêşêna xo bigîro. O wext nizdîyê 90 kesî merdî. Recep nêşêna vera nînan de bivindero. O her tim waştêne ke şêro vera zaliman de şer bikero. Dima ra çîyê ke weçînayîşê 7ê Hezîrane de bîyî ver Recep bi temamî hêrs bîbî. Seba Recepî wextê şîyayîşî amebî û şî…”
Seke yeno zanayîş ke cenazeya Karataşî qezaya Torbali ya Îzmîrî de ameybî definkerdiş. Dima ra provokasyonan ver cenaze ewja ra ameybî vetiş û Erzîrom de ameybî definkerdiş.
ANF/ ÎZMÎR