Sey ke yeno zanayîş 1ê Êlule her serre sey Roja Aştîye ya Cîhanî yena pîrozkerdiş û emser zî na roje rê tena 2 rojî mendîy. 

Endama Grûba Aştîye Yuksel Gençe Tirkîya de aştîyêka senîn bena ser o qisey kerde û vînayîşê xo arde ziwan. 

Gençe derheqê persanê problemê kurdî de prosesê çareserî senîn û kura ra dest pêkeno û se beno ser o qisey kerde û wina va: “Merdim eşkeno ancax bi tecrubeyanê verênan cewabê nê persan bivîno. Çimkî heme çî sere ra dest pênêkeno, cok ra gêrayîşê çareserîye zî sere ra dest pênêkeno. Reya sifteyîne serra 99î de têkilîya problemê kurd û aştîye ameye ronayîş. O wext seba çareserîye gamê muhîmî erzîyaybî, labelê o wext kurd û problemê kurdî nêameyênê qebulkerdiş. Înkar bi hawayo akerde ameyêne kerdiş. Proseso ke 99 de dest pêkerd, heta 2004î bi sebrêko gird dewam kerd. No wext AKP bî îqtîdar û AKP ser nê prosesî ra bî îqtîdar. Bi ameyîşê ma ra dima problemê kurdî ame munaqeşekerdiş û AKP ser nêyî ra bî îqtîdar.” 


Tirkîya ancax PKK reyde bena demokratîke

Gençe dîyar kerde ke ê heta nika qet hêvîya xo ya aştîye vînî nêkerdî û wina dewam kerde: “100 serrî zî derbaz bibîy, problemê kurd ancax bi hêzê ke şer kenî reyde çareser beno. Tirkîya ancax bi PKK bena demokratîke. No proses 99 ra heta 2009 nizdîyê 10 serran dewam kerd û 2009 de grûbêka dîyine ya aştîye ameye. Labelê çi heyf ke hukmatê AKPyî nêşîna prosesê îdare bikero. Tirkîya ti wext qasê 2013î nizdîyê çareserîye nêbî, labelê o zî bi prosesê 7ê Hezîrane ra dima têk şî. Nika prosesê înkar û îmhayî dewre de yo, labelê heta peynî şer nêbeno. Habîl û Kabîl daxî heta peynî şer nêkerdî. Se beno wa bibo, do peynîye de aştî bibo. Ganî problemê kurd bi dînamîkanê neweyan bêro çareserkerdiş. Ganî yê ke probleman çareser kenî bi proje û temînatanê neweyan bêrî. Çimkî problemê kurdî tena bi qiseykerdişî çareser nêbeno. 


Her serre zafêr lazimî bi aştî esta

Gençe peynîya qiseykerdişê xo de wina va: “1ê Êlule emser her welat de do bi hawayo cîya bêro pîrozkerdiş. Çimkî polîtîkayê şîddet û şerî heme dinya de vila bîyî. Dinya de şerêko evrensel esto û her serrî ra zafêr lazimî bi aştîye esta. Cok ra emser 1ê Êlule zaf muhîm o. Ganî şarî bi hawayo hêz aştîye biqîrî, çimkî îdarekarî dinya ardî rewşêka nêbaşe. Lazimîya heme dinya bi demokrasî û tevgerêko demokratîke esta. 1ê Êlule seba nêyî firsend o.” 



Do Bakirkoy de bêro pîrozkerdiş


Koordînasyonê Kede û Demokrasî yê Stenbolî bi wesîleya 1ê Êlule Roja Aştîye ya Cîhanî do 10ê Êlule de Rasteyê Azadîye yê Bakirkoyî de mîtîngêk bivirazo. Koordînasyon do bi şîarê ‘Aştî, Azadî, Edalet, OHALî rê Nê, Wa KHKyî betal bibîy’ mîtîng bivirazo. 

Babete ser o Temsîlkarê Kongreya Demokratîke (HDK) Îlhan Turhan Yildirimî dîyar kerd ke emser 1ê Êlule hîna bimana yo û wina dewam kerd: “Emser rewşêka krîtîke de yeno pîrozkerdiş. AKP seba ke îqtîdarê xo xurt bikero, nê şerî meşneno. Ma wazenî 1ê Êlule de bale biancî ser nê şerî. Ganî herkes beşdarê mîtîngî bibo.”

Sazî û dezgeyê ke mîyanê kordînasyonî de ca gênî, nê yî; HDP, HDK, EMEP, Keyeyê Şarî, Kaldiraç, EHP, KESK, TMMOB, DÎSK, TTB, SEP, KOZ, Proleter Devrîmcî, HTKP, ODP. 



 STENBOL/ANF