Taxa Cûdî yê Cizîr de, 7 rojiyo 15 dirbetinî, 7 cenaze û 9 sivîlan ra xeber nîna giroten. Vizêr zî gurekaranê weşî û ambûlansan hewl day ke şirê dirbetinan bigîrê. La wexto ke ambûlansî nezdiyê banî bî êrişê quwetanê dewlet destpa kerdî. Cok ra ambûlansî peyser şî. 15 rojiyo ke dirbetinî bodrim de manenê. Qandê ke mudaxaleyê tibî nêbi, dirbetinan ra 7ê ci weşiya xo kerdî vinî.
9 kesî veşnay
Heto bin ra, jew bodrimê keyeyê bîn yê taxa Cûdî de ke 37 kesê dirbetin miyan de bî, netîceyê topeştişan adir girot. Ekîbê îtfaîye ke waştî adir tefînê hetê qûwetanê dewlet peyser rişiyay. Adir bi sebebê wehşetekê newî. Netîceyê adirî de dirbetinan ra 9ê ci ganî bi ganî veşiyay. Hemserokê Meclîsê Şar yê Cizîr Mehmet Tûnç’î aşkere kerd ke, 9 dirbetinî veşiyayê û gan da yê.Tûnç’î da zonayene ke, Cizîr de wehşeta zey DAIŞ qewimena û wina va: “Senî ke çeteyanê DAIŞ eştî Rojawa ser û her ca rijinay se, Cizîr zî eynî rewş de yo. Bodrimê bînî de, xeylê dirbetinan rîwalê teyşanî weşiya xo kerdî vinî.
Cizîr de kamcî çekî şixûlniyay?
Tûnç’î hayr ant bodrimê bînî ke başûrê Cizîr de yo ser û wina va: Bado ke no ca tespît kerdî, bi topanê hewan û obusan êriş kerdî. Qatê 4. bi temamhi rijiya. Ma texmîn kenê ke çekê Lav şixûlnayê. Ma veng danê Jûbiyena Neteweyan û merdimatî ke vera na wehşet bikewê hereket. Tûnç’î da zonayene ke, adiro ke vejya, adirekê normal nêbi. Wexto ke înan waştî temirînê kila adir hona bî gird. Ganî cenazeyê kesê ke amey qetilkerdiş bîrê cipersyayen. Ganî bîro tespîtkerdin ke kamcî tifingî ameyê şixûlnayen. Mehmet Tûnç’î da zonayene ke zereyê dirbetinan de domanê 13-14 serrî estê.Fermanê operasyonî kê da?
Wekîlê Coma HDP Îdrîs Balûken’î qetlîam rê nêrazîbiyen damûsna û aşkere kerd ke, Cizîr de Madimak’a newî qewimî. Balûken’î aşkere kerd ke Cizîr de zihnîyeta ke merdimatiya xo vinî kerda esta.Vera qetlîama Cizîr jû nêrazîbiyen zî ABF ra amê. Serokê Federasyonê Alewî Bektaşî Bakî Duzgun’î zî qetlîam zey zihnîyetê Madimak bi name kerd. Duzgun’î persê, ‘kam Cizîr îdare keno’, ‘kê fermanê operasyonî da’ kerd û aşkere kerd ke, nê pêrokîn çiyî herbê qilêrîn damusnenê. Duzgun’î va, serkewtî û vinîyê no herbî nêbeno û aşkere kerd ke kamcî cayê dinya de hiqûqê da winayîn esta.
DÎHA/ŞIRNEX