Avûkatê Rayberê Şarê Kurdî Abdullah Ocalanî Îbrahîm Bîlmezî tecrîdî rê hêrsê xo ard ziwan û va: “Ganî sere de CPT û sewbîna dezgeyê Ewropa seba Îmrali cade bikewî dewre. Meseleyê kurdî de muxatabê dewleta tirkî Ocalan o. Qerarê MHMEyî sîyasî yo.”

Tecrîdo girankerde ke Rayberê Şarê Kurdî Abdullah Ocalanî ser o yeno domnayene, dewam keno. Ocalan 15ê sibata 1999î ra nata Girawa Îmrali de binê tecrîdêko giran de yo û 11ê Êlula 2016î de tena pêvînayîşêko kilm viraştbî û o wext ra nata ti xebere tira nîna girewtene. Heme muracatê pêvînayîşî bi mehneyanê ‘Keştîye xirabe ya, rewşa hewayî baş nîya û OHAL’ û cîya cîyayan yenî red kerdene.  Avûkatê Ocalanî Îbrahîm Bîlmezî qala Girawa Îmrali, Komîteya Vernîgirewtişê Muameleyo Xirab û Îşkenceyî ya Ewropa (CPT) û Mehkemeya Heqanê Merdiman ya Ewropa (MHME) kerd.

Bîlmezî qiseykerdişê xo de bale ant bêhuqûqîyê Îmrali ser û va: “Tecrîdê Îmrali serra 1999î ra nata esto û çend şono xorî beno. Xora no tecrîd pabesteyê komploya mîyanneteweyîye yo. No komplo ke şexsê Ocalanî de azadîya kurdan hedef girewtêne ewro zî dewam keno. Hêzanê serdestan waştî ke Ocalanî binate ra wedarî, la hemverê fikir û îdeolojîyê Ocalanî de ê bi xo çîn bîyî.”

Tirkîye huqûqî ra dûrî kewena

Bîlmezî dewamê qiseykerdişê xo de vist vîrî ke heme muracatê pêvînayîşê Ocalanî yê înan yenî redkerdene û wina domna: “Heta nika bi behaneyanê cîya cîyayan pêro muracatî ameyî redkerdene. Roja verêne ra nata Îmrali de huqûq çîn o. Tirkîye pede-pede huqûqî ra dûrî kewena.”

Qerarê MHMEyî sîyasî yo

Bîlmezî derheqê qerarê Mehkemeya Heqê Merdiman ya Ewropa (MHME) de zî hêrsê xo ard ziwan û va: “Qerarê MHMEyî sîyasî yo û ê bi nê qerarî amacê xo ra dûrî kewtî. Xora pawitişê Birêz Ocalanî nê dezgeyan ra çîn o. Nika rolo pîl ê CPTyî yo. Ganî CPT cade şêro Îmrali û derheqê weşîya Ocalanî de bi raporêk zanayîş bido rayapêroyî. Ganî sere de CPT û sewbîna pêroyê dezgeyê Ewropa cade bikewî dewre.”

Muxatabê dewleta tirkî Ocalan o

Bîlmezî qala muhîmîya rolê Ocalanî zî kerd û qiseykerdişê xo wina qedîna: “Ocalan rayberêko bitesîr o û hetkarê aşitîye yo. Meseleyê kurdî de muxatabê dewleta tirkî Ocalan o. Mesajê Ocalanî yê Newrozî hetê bi mîlyonan ra ameyî goşdarîkerdene û seba şaran bîyî umîd. Ocalan pawitişanê xo yê ke şawitî  MHMEyî de vano ke ‘Ez seba meseleyê kurdî yena muhakemekerdene û binê tecrîdî de ya. Heta ke meseleyê kurdan hal mebo, meseleyê Rojhelato Mîyanêne zî çareser nêbeno û ez zî azad nêbena.’ Dewlete heta cayêk eşkena mudaxaleyê komelî bikero, la nuqteyêk ra dima şar xo îdare keno.”

 

AMED