BÎLAL SEÇKÎN / MA/STENBOL
Rayberê Şarê Kurd Abdullah Ocalan 27ê temmuza 2011î ra nata nêşêno avûkatanê xo reyde pêvînayîşan bikero. Reyna serra 2015î ra nata bi Heyetê Îmrali nêşêno pêvînayîş bikero û nizdîyê 2 serrî yo zî ti xebere Îmrali ra nîna girewtiş.
Çend rojî verê 250 avûkatî seba ke Ocalanî reyde pêvînayîş bikerî, muracatê Serdozgerîya Komare ya Bursa kerdbî. Labelê muracatê avûkatan amebî redkerdiş. Nê avûkatan ra yewe zî Gulîzar Tuncere ya. Tuncere babete ser o qisey kerde û vera kerdişanê Tirkîya de reaksîyon nîşan daye.
Tuncere va ‘Qanûnê ke Girawa Îmrali de yenî bicaardiş, qanûnê ke ti zîndanî de nînî bicaardiş î’ û wina dewam kerde: “Îmrali de rewşe nika ê neheqîyê ke ê qanûnan zaf derbaz kerda, yena cuyayîş û heme dinya vera nê neheqîyan de bêveng a.”
AÎHM zî ortaxê sucî yo
Tuncere dewamê qiseykerdişê xo de va ‘tecrîd sucêko mîyanneteweyî yo û welatê Ewropa zî ortaxê nê sucî yî’ û wina domnaye: “Tirkîyaye hetê mîyanneteweyî de selahîyetê Mehkemeya Heqê Merdiman ya Ewropa (AÎHM) qebul kerda û goreyê peymana ke AÎHMî derheqê Ocalanî de dayo, madeya 3.î îxlal kerda. Na rewşe de Komîteya Wezîran ya Konseyê Ewropa ke caardişê qeraranê AÎHMî ra berpirsîyar a, derheqê Tirkîya de tayê qeraran bigîro. Labelê nêgêna.”
Tecrîd giran o,labelê CPT bêveng o
Tuncere bale ante ser vindetişê Ewropa ser û wina va: “Ma zanî ke Ewropa seba menfîetanê xo bi serran o vera neheqî û bêhuqûqîyê ke Tirkîya de benî de bêveng manena. Xora vindetişê Ewropa yê vera tecrîdî de zî nîşanê ma dano. Çîyê ke Tirkîya de benî Ewropa eleqeder nêkenî. Tirkîya hertim berpirsîyarîya peymane û qeraranê AÎHMî îxlal kena. Qerarê ke derheqê Ocalanî de ameyî girewtiş zî nîşaneyê ci yî.”
Tecrîd teberê merdimîye yo
Tuncere qiseykerdişê xo de qala tecrîdo ke Îmrali de esto kerde û wina va: “Îmrali de tecrîdo ke teberê merdimîye esto. Cezaya girankerde ya muebedî dîyaya yew merdimî û do heta peynîya emrê xo zîndan de bimano. Na cezaya ke teberê merdimîye de ya. Çimkî merdim nêşêno heta peynîya emrê ci merdimêk tena sereyê xo hucre de bitepişo. Ti cayê dinya de çîyêko winasî çin o. Welatanê Ewropa, Amerîka û parzemînanê bînan de zî çîyêko winasî çin o û ê cayan de înfazê cezayanê winasîyan yenî vindarnayîş.”
Tuncere peynîya qiseykerdişê xo de wina va: “Yew merdim heta peynîya emrê xo tena wezîfedarê zîndanî reyde têrî ameyo verdayîş û no daxî b sereyê xo tecrîdêko giran o. Heto bîn de derheqê Ocalanî de çîyêko winasî esto; Xeylê dosyayê Ocalanî ke nika AÎHM de dewam kenî, estî. Seba nêyî bo zî ganî pêvînayîşî bêrî kerdiş û avûkatî şêrî pêvînayîş bikerî.”