Endamê Komîteya Caardişî yê PKKyî Duran Kalkanî derheqê xoverdayîşê xoserîye, bloka faşîst yê AKP, MHP û CHPyî û rewşa Rojawanî de qisey kerd.

Endamê Komîteya Caardişî yê PKKyî Kalkanî va ‘serra 2016 bî serra xoverdayîş û qehremanîye’ û wina domna: “Bi rayberîya Andok û Axînan de ciwanê kurdî vera heme hêrişan de bi hawayo cesaret vindetî. Cesaret, fedakarî û qehremanîya înan de ti problem çin o. Labelê lazim o ciwanî xo hîna zêde perwerde û rêxistine bikerî. Ganî hîna zaf biresî westatîye; çimkî dişmeno ke hêriş keno, perwerdekerde û profesyonel o. Cok ra ganî ê zî biresî duştê profesyonelîye.” 

Evrenî ra xirabêr o

Kalkanî dewamê qiseykerdişê xo de va ‘faşîzmê AKP û MHPyî faşîzmê Hîtlerî ke merdiman eştêne odeyanê gazî ra xirabêr îşkence bi şarî keno’ û wina dewam kerd: “Ewro Tirkîya de îşkenceyêko gird esto. Bi her hawayî tecawiz, heqaret û zulm bi merdiman yeno kerdiş û faşîzmê Kenan Evrenî ra hîna aver şîyo. Nêyî dinyanedî yî, Kenan Evren zî dinyanedî bî. Mîyanê artêşa tirk de yê tewr cahil û egoîst Evren bî, mîyanê sîyasetê tirkan de zî yê tewr cahil û egoîst zî Erdogan o. Yew wext Evren û nika zî Erdogan bîyo belaya sereyê şarê Tirkîya. Nêyî menfîetê xo ra vîşêr çîyêk nêfikiryenî; ganî merdim bermayîşê înan ra nêewnîyo. Çimkî hêsirê înan hêsirê tîmsehan î.”

Kalkanî bale ant bloka faşîst ya AKP-MHP û CHPyî û wina va: “Netîceyê hêrişê faşîzmî de yew cîyabîyayîş vejîya orte. Nê cîyabîyayîşî ma nêkerd, cepheyo faşîst kerd. Netîceyê zêdebîyayîşê faşîzmî de bloka faşîst ya AKP-MHP û CHPyî vejîya raste. Cok ra ganî vera na bloka faşîst de bloka demokrasî zî bibîyêne. Çimkî vera hêrişanê hende giranan de eke bloka demokrasî nêba o wext hêzê demokratîke çin bibî. Hêzê çepgir û sosyalîstî fam kerdî ke eke tevgerê kurdan bipelçiqîyo, o wext ser nameyê demokrasî çîk nêmaneno. Cok ra kurdan reyde lazimîya viraştişê îtîfaqî dîyî. Bi nameyê Tevgerê Şoreşê Pêrabeste yê Şaran (HBDH) awan bî û mîyanê 7-8 aşman de pratîkêk zî vejîya orte. Her çiqas ke kêmanîya nê tevgerî bibî zî, no tevger bloka faşîst zaf tersna û nê semedî ra nika hêriş kenî.”


AKP yo ke bi şer lingan ser de vindeno, do birijîyo

Kalkanî ard ziwan ke ‘AKPyo ke xo bi şerê Sûrîye û Kurdistanî lingan ser de gêno, demêko nizdî de do birijîyo’ û va: “Hêzê sey Rûsya, Îran û Tirkîya waştî ke bedilîyayîşê îdareyê Amerîka ra feyde bivînî. Amerîka va ‘ma Mûsil û Reqa de operasyonan kenî û vera DAIŞî de têkoşîn danî’ la yew aşme yo ke şer Heleb û Bab de beno. Rûsya, Îran û Esad zî prosesêko winasî de Heleb de şer aver berd. Tirkîya zî waşt ke bi îtîfaqê Rûsya planê Amerîka xira bibo, la wina aseno ke hedîseyî sey ke Tirkîya wazena, nêşonî. Wina aseno ke Tirkîya ameya kayanê Rûsya û Îranî. Eke wina bibo, halê Tirkîya nêbaş o; çimkî eke çeteyê ke girêdayeyê Tirkîya yî, Heleb de vînî kerdî.”

Amerîka piştî nêdana

Kalkanî va ‘Amerîka piştî nêdana polîtîkayanê Tirkîya’ û wina domna: “Bi îtîfaqê Rûsya û Îranî wina aseno ke Tirkîya grûbê ke girêdayeyê xo yî yewna rey roto. Yeno zanayîş ke dewleta tirk verê cû DAIŞî kerdbî babeta bazarî û nika zî El Nusra keno. Eke wina bibo rewşa Tirkîya xeylê nêbaş a. Tirkîya nika wazena Heleb bida Îran û Rûsya û xeta Bab – Minbic de aver şêra. Beno ke Tirkîya bi no hawa Sûrîye de Amerîka bidekero mîyanê zorî, wina hereket kena. Çimkî Amerîka piştî nêdana nê polîtîkayanê Tirkîya.”


Ganî ciwanî beşdarê têkoşînî bibî

Kalkanî dîyar kerd ke ‘yê ke rastê hêrişanê faşîzmî yenî, ganî xo hîna zaf perwerde û rêxistine bikerî’ û va: “Na çarçewa de ganî ciwanî hîna zaf beşdarê têkoşînî bibî. Ganî bi hawayo grûbe bi grûbe verê xo bidî koyan û beşdarê gerîla bibî. Reyna ganî bajaran de xover bidî, kura de û senî eşkenî xover bidî, ganî têkoşîn bidî. Lazim o vera faşîzmî de yê ke xover nêdo, nêmano. Eke ciwanî bi no hawa bikerî eşkenî faşîzm birijnî û şoreşê demoktarîke biresnî serkewtişî. Ma bawer kenî ke ciwanî do nê hêzî nîşan bidî û ma xoverdayîşê ciwanan silam kenî. 


ERSÎN ÇELÎK / ANF / BEHDÎNAN