Teşebusê derbe ra dima bi Qerarnameyanê Hukmê Qanûnî 370 sazî û dezgeyê sîvîlî ke seba komelî xizmet dayênê ameybî padayîş. Mîyanê nê sazî û dezgeyan de Komeleya Cigêrayîş û Averberdişê Ziwanê Kurdî (KURDÎ-DER) ya Silopîyaya Şirnexî zî estbî. 

Komeleya ke serra 2010 de hetê çend kesan ra ameybî akerdiş û xebatkarê ci bi zerrîye xebetîyayênê, heta nika bi hezaran doman, ciwan û kesê ke wendiş û nuştişê înan çinêbî, înan banderê ziwanê kurdî kerda. Komele mîyanê şarî de sey cayêko pîroz ameyêne dîyayîş û bi morkerdişê berê komele, wazîyeno ke xebatê ziwanî yê Silopîyaye bêro astengkerdiş. 

Babete ser o mamosta û Hemserekê KURDÎ-DERî yê Silopîyaya Şirnexî Aydin Denîzî qisey kerd.

Awankerdişê Komare nata dişmenîya kurdan kenî

Mamosta Aydin Denîzî qiseykerdişê xo de bale ant ser polîtîkayanê dewlete yê bi seyan serran û qiseykerdişê xo wina domna: “Awankerdişê komare ra heta nika her tim vera ziwanê kurdî de dişmenîye ameyo kerdiş. Bi hezaran welatîyan seba ke ziwanê xo yê dayîke qisey kerdî rastê cezayan ameyî. Vengdayîşê ma seba raya pêroyî û şarê tirkî esto. Ma vanî fek dij kurdîtî û dişmenî ra verabidênê. Bi no hawa şima nêeşkenî biresî yew ca.”


Êdî her ca bîyo mektebê ziwanê kurdî

Denîz va hedefê AKPyî astengkerdişê averberdişê ziwanî yo û qiseykerdişê xo ra wina dewam kerd: “Nê semedî ra sazî û dezgeyanê ziwanî pada. Bi akerdişê KURDÎ-DERî bi desan şaxê ma ameyî akerdiş, reyna bi desan mektebê ziwanî abîy. Nê sazî û dezgeyan de bi hezaran şagirdî û mamostayê ma resayî. Êdî her ca bîyo mektebê ziwanî. Perwerdeyê ziwanê kurdî resayo duştê tewr berz. Muhîmîya ziwanê kurdÎ ame dîyayîş. Hukmatê AKPyî vano ‘ma sazî û mektebanê înan pada û ma vernîya averşîyayîşê ziwanê înan girewt.’ Labelê wa baş bizanî ke ma do her ca bikerî, cayê musayîşê ziwanî. Ma do bimûsî, bimusnî û qisey bikerî û bi no hawa ma do ziwanê xo heme dinya de vila bikerî. Mekteb tena mîyanê çar dêsan de nêbeno. Heme ca, cayê perwerdeyî yo. Her keye sey mekteb o. Ma do her tim ziwanê xo aver bîşêrî. Ma do her cayê cuye de ziwanê xo biciwîyî.”

Ganî her kes bi ziwanê kurdî qisey bikerî

Denîzî qiseykerdişê xo de veng da heme keyeyê kurdan û qiseykerdişê xo wina qedêna: “Ganî heme keyeyê ma yê kurdan heta ke eşkenî bi doman û dormeyê xo reyde bi kurdî qisey bikerî. Wa baş bizanî ke ti hêz nêşkeno vernîya ziwanî û averşîyayîşî ziwanî bigîro. Ti wext sernêkewenî. Rojhelato Mîyanên de ziwanêko tewr kehen û dewlemend ziwanê kurdî yo. Sey Ehmedê Xanî, Melayê Cizîrî, Elîyê Herîrî, Baba Tahîr Hemedanî û sewbîna bi desan kesê kes ey mamostayan ziwanê kurdî ser o xebatan kerdî û bi kurdî nuştî. Ziwanê ma ziwanêko komelkî yo. Heta nika xeylê vateyî ziwanê ma ra ameyî tirawitiş. Sey durbîn, çerçove û sewbîna. Ma do bi nê zanayîşî wayîrê ziwanê xo bivejyî.” 

DÎHABER/ŞIRNEX