Rayberê Şarê Kurd Abdullah Ocalan nizdîyê 2 serrî yo ke nêşêno keyeyê xo reyde, 7 serrî yo ke avûkatanê xo reyde û nizdîyê 3 serrî yo ke zî nêşêno Heyetê Îmrali reyde pêvînayîş bikero. Tewr peynî badê ke sîyasetmedarî kewtbî grevê vêşanî, birayê ci şîbî pêvînayîş. Babete ser o Birayê Ocalanî Mehmet Ocalanî qisey kerd û vera na rewşe de reaksîyon nîşan da.
Mehmet Ocalanî va ‘15 aşmî ra zêde yo ke muracatê ma yenî redkerdiş’ û wina dewam kerd: “Pêvînayîş wa ewja de bimano, ma ti xebere ti ra nêgênî. Ma nêzanî senî îzeh bikerî, labelê ganî herkes karê xo raşt bikero. Eke no welat de qala huqûq û edaletî yena kerdiş, ganî desî ra yewê ci bêro ca. Dinya û Rojhelato Mîyanên de nimûneya nêyî çin o. Wazeno wa hukimwer bibo, wazeno wa tepişte bibo, heqê herkesî esto ke avûkat û keyeyê xo reyde pêvînayîş bikero.”
Yê ke heq nêkero rê fikrê Ocalanî heram o
Mehmet Ocalanî dewamê qiseykerdişê xod e wina va: “Verê cû ma çîyêk nêzanayêne. Ma keyeyê xo de nêzanayêne tirkî qisey bikerî, labelê ma xo tirk hesibnayênê. Ma ver bi çinîbîyayîşî şîyênê. Vera çinêbîyayîşî de ma çîyêk nêkerd. Rayberê nê fikrî Ocalan o. Ma çîyê ke layîqê ci bibî, nêkenî. Ma nêzanî rewşa ci çî ya. Ma heme fikrê ci ra miqate benî. Labelê lazimîya fikranê ci nêkenî. No fikir yê ke layîqê ci nîyî rê heram o. Ma dewlete ra merhamet nêwazenî, heqê xo wazenî. Wa merdimê demokrat û roşnvîrî bikewî dewre. Ma dewlete baş şinasnenî. 100 serrî yo se kena, nika zî eynî çî domnena. Ma wezîfeyê xo nêkerd. Wezîfe û berpirsîyarî kewenî milê kamî, ganî bîyaro ca. Bawerîya ma şarê ma esta. Problem yê ke têkoşînê demokratîke danî, çîyo lazim nêkenî yo.”
Seba çareserîye azadîya ci lazim a
Mehmet Ocalanî va ‘êdî ganî Ocalan azade bibo’ û wina domna: “Ganî çîyêko keweno milê ma ser, ma bikerî. Heta ke problemê kurdî çareser bibo, problemê şaran, yê demokratan, kedkaran çareser nêbenî. Rayberîye hucre de yena tepiştiş û ma rewşa aye nêzanî. Ma zî fikirîyayîşê ci ver, cuya hucreyî cuyenî. Ma veng danî heme dezgeyan ke wa çîyo lazim bikerî. Rayîrê Îmrali ancax bi têkoşînê demokratîke abeno. Ma 19 serrî şahidîya nêyî kerd. Azadîya welatî, girêdayeyê azadîya Rayberîye ya. Azadîya ci, azadîya komelî ya. Keda Ocalanî herkesî ser de esto, cok ra ganî ma heqê nê kede bidî.”
Vera her di hetan de zî hêrsin bî
Mehmet Ocalanî bale ant pêvînayîşo peyên ser û wina va: “Wexto ke o wext mi ci dî hetê fîzîkî û weşîye de baş asayêne. Rayberîye vera her di hetan de zî hêrsin bî. Rayberîye vatêne ‘dewlete berpirsîyarîya xo nêana ca. No yeno famkerdiş labelê çira heto bîn berpirsîyarîya xo nêano ca. No nîno famkerdiş. Eke dewlete berpirsîyarî bigîro, 6 aşman de problem çareser beno’. Ma 15 aşmî yo ke qet xebere nêgirewt. Ma nêzanî rewşa ci çî ya?”
MA/RIHA
