ŞEHRÎBAN ASLAN / JINNEWS/AMED
Parlamentera HDPyî ya Amedî Feleknas Ucaye derheqê yewîya neteweyî ke dagîrkerîya Kerkûkî ra dima yewna rey ameye rojeve de qisey kerde û vînayîşê xo ardî ziwan.
Ucaye va ‘serra 1923î de dewletan Kurdistan kerdî çar parçe’ û wina dewam kerde: “Nika zî wazenî newe ra sînoran bierzî mîyanê kurdan. Amancê înan o yo ke qezencanê kurdan destê înan ra bigîrî. Reyna wazenî statuyo ke kurdan 2004 de Başûr de qezenç kerdbî zî destê înan ra bigîrî. Senî ke tecrîdo ke Ocalanî ser de yo ser 40 mîlyon kesan de esto, teslîmbîyayîşo ke Kerkûk, Şengal, Germîyan û sewbîna cayan de esto zî sey na rewşe ya. Wazenî erdê kurdan destê kurdan ra bigîrî.”
Ucaye dewamê qiseykerdişê xo de bale ante ser Kongreya Neteweyî ya Kurdî ser û wina va: “Ganî Kongreya Neteweyî ya Kurdî lezabez bêro viraştiş. Ewro Rojhelato Mîyanên de sînorî newe ra yenî xêzkerdiş. Îqtîdarî wazenî ke wa kurdî bi hawayo kole bicuyî. Ganî kurdî biwerzî payan ser û erdê xo rê wayîr bivejyî. Yan ma erdê xo rê wayîr vejîyenî, yan zî ma do 100 serrê bînî zî kole bicuyî. Yê ke wazenî nê koletîye bicuyî wa bicuyî, labelê ma do seba cuya azade têkoşîn bidî.”
Kurdî do hêrişan veng bivejî
Ucaye peynîya qiseykerdişê xo de wina va: “Tirkîya demêko derg o ke seba Kerkûk û Mûsilî munaqeşe kena. Vera hêrişê ke Tirkîya Başûrî ser de kena de hukmatê Başûrî bêveng maneno. Mîmarê konseptê ewroyî çeteyê ke hetê Tirkîya ra yenî miqatekerdiş î. Ganî ma dişmenê xo nêdî huyayîş û nêbî sebebê Şengalo 2. Ma do çi destê ma ra bêro, bikerî. Şar do nê sîyaset, komplo û hêrişan veng bivejo.”