SELMAN GUZELYUZ / MA / ANQARA

Hêrişê dagîrkerîye yê dewleta Tirkî ke bi tesdîqkerdişê Amerîka û Rûsya ameyî kerdene, nika resayo merhaleyêko newe. Endamê Komîteya Têkilîyanê Teberî yê Kongreya Neteweyî ya Kurdîstanî (KNK) Selahhattîn Soroyî derheqê averşîyayîşanê dîplomatîkan ser o vindet û mesajê muhîmî dayî.

Soroyî va ‘Amerîka, Rûsya û Îsraîlî Rojhelato Mîyanên de prosesêko newe dayo destpêkerdene’ û wina dewam kerd: “Parekerdişêko newe esto û no parekerdiş Sûrîye û Îraqî ser o do bêro kerdene. Prosesê ameyoxî de bingehê pêrodayîşan do Îraq û Sûrîye ser o bidomyo. Ganî wina bêro vînayene.”

Soroyî qiseykerdişê xo de va ‘herême ra ancîyayîşê Amerîka yeno manaya rijîyayîşê dengeyo ke 8 serrî yo vera DAÎŞî de estbi’ û wina domna: “Ancîyayîşê leşkeranê Amerîka zî yeno manaya ke Sûrîye de dengeyê neweyî awan bibî. Ganî merdim na denge sey destpêkê prosesê kaosî şinase bikero. Na denge de do şerê stratejîkî yê Îran û Tirkîya bibo. Beno ke hetê fîzîkî ra Amerîka xo anto, labelê hetê sîyasî ra qetîyen xo nêanto. Tena pozîsyonê xo bedilneno. Cayê ke hetê Amerîka ra ameyî vengkerdene, hetê Tirkîya ra ameyî girewtene û no zî seba ke qezencê Kurdan bêrî çinkerdene, bi.”

Seba Kurdan donemêko newe

Soroyî qiseykerdişê xo de da zanayene ke şer tena bi sîlehan û mewzîyan de nîno kerdene û wina va: “Şer eynî wext de masa de, dîplomasî û korîdoran de yeno kerdene. Kurdan demêk şer kerd û nika zî prosesê dîplomatîkî de yî. No zî şer û têkoşînêk o. Senî ke Kurdan vera DAÎŞî de hêzê xo yê YPG, YPJ û QSDyî awan kerdî û şer kerdî, ganî nika zî seba pawitişê qezencanê xo dîplomasî bikerî. Seba Kurdan donemêko newe dest pêkeno.”

Raya pêroyî de deşîfre bîya ke

hemparê çeteyan a

Soroyî qala çîyê ke hetê Tirkîya ra yenî kerdene û sey ‘serkewtişê diplomasî’ yenî nîşandayene kerde û wina va: “Beno ke ê wina nîşan danî. Labelê ganî merdim biewnîyo, se bî û nika se bîya. Tirkîya waşte Esadî bîyaro war, la nêşêna. Hewl da artêşêka alternatîfe awan bikera û serbikewa, la sernêkewte. Reyna waşte hukmatêko alternatîf pê bîyaro, la sernêkewte. Sûrîye de do nimaj biaemeyêne kerdene, o zî nêbi. Nika beno ke Tirkîya tayê cayanê Vakur û Rojhelatê Sûrîye dest visto, labelê raya pêroyî ya mîyanneteweyî de teşhîr bîya ke hemparê çeteyan a. Ganî merdim wina bivîno.”

Kurdî teberê çareserîye de nêverdîyenî

Soroyî qiseykerdişê xo de qala 10 madeyanê ke mabênê Tirkîya û Rûsya de ameyî pêkerdene kerde û wina va: “Mumkun nîyo ke Sûrîye û Rûsya Kurdan teberê prosesî de biverdî. Çimkî seba ke Esad sîstemê xo bidomno, lazimîya ci bi Kurdan esta. Nika xeyalê Rûsya yê 200 serran pê ameyî û Rûsya hem Behro spî de û hem zî Rojhelato Mîyanên de bîyo aktoro sereke. Kurdî senî ke hetê leşkerî de ameyî rojeva dinya, ewro zî bi dîplomasîyo xo muxatabê tewr muhîmî yî. Ganî sîyasetê dîplomatîkî û neteweyî aver şêrî.”